Vazirlar Mahkamasining 26.08.2025 yildagi 538-son qarori bilan ayrim normativ-huquqiy hujjatlarga oʻzgartirish va qoʻshimchalar kiritildi.
Xususan, 11.01.1995 yildagi 11-son VMQ bilan tasdiqlangan Xorijiy davlatlar ogʻir yukli va katta hajmli transport vositalarining Oʻzbekiston Respublikasi hududi boʻylab yurishi uchun toʻlovlar toʻgʻrisidagi nizomga quyidagi oʻzgartirishlar kiritildi:
Transport vositasining umumiy haqiqiy massasi ruхsat berilganiga nisbatan oshganligi uchun toʻlov yangi tariflarga muvofiq belgilanadi (1-jadvalga qarang). Bunda umumiy haqiqiy massaning ruхsat berilganiga nisbatan oshishi miqdoriga (tonn) qarab 1 km yurilgan masofa uchun tariflar (AQSh dollarida belgilangan) oʻrtacha 2 baravar oshirildi.
Ogʻir yukli transport vositalarining avtomobil yoʻllaridan oʻtishida oʻqqa tushadigan haqiqiy ogʻirlikning (Of) ruхsat berilganga (Od) nisbatan oshganligi uchun har bir ortiqcha yuklangan yuk uchun toʻlov ham oʻzgardi (2-jadval). Bunda tariflar ham oshirildi.
Transport vositalari hajmlarining ortiqchaligi uchun toʻlov yurib oʻtilgan 1 km yoʻl uchun $0,32 ($0,15 edi) miqdorida undiriladi.
Ogʻir yukli va yirik gabaritli transport vositalari oʻtishi uchun arizalarni koʻrib chiqish, yoʻnalishni kelishish va ruхsatnoma berish uchun toʻlanadigan toʻlov miqdori "Litsenziya" aхborot tizimida quyidagi tarzda aniqlanadi:
- 100 km ga qadar — BHMning 54%i ($5 edi);
- har bir keyingi kilometr uchun – BHMning 0,24%i ($0,11 edi).
Hujjat Qonun hujjatlari ma’lumotlari milliy bazasida e’lon qilingan va 27.08.2025 yildan kuchga kirdi.
Lola Abduazimova
