Vazirlar Mahkamasining 20.03.2019 yildagi 236-son qarori bilan «Madaniyat va san’at fidokori» koʻkrak nishoni toʻgʻrisida nizom tasdiqlandi.
U bilan oʻzbek milliy madaniyati va san’ati nufuzini jahon miqyosida oshirish borasida fidokorona mehnat qilgan va ushbu sohada yuqori natijalarga erishgan fuqarolar taqdirlanadi.
Taqdirlash boʻyicha takliflar hududiy madaniyat boshqarmalariga har yili 1 oktyabrga qadar taqdim etiladi.
Madaniyat vazirligida nomzodlarning hujjatlari oʻrganilib, 1 dekabrga qadar eng munosib nomzodlarni taqdirlash toʻgʻrisida qaror qabul qilinadi. Koʻkrak nishoni Yangi yil bayrami arafasida madaniyat vaziri tomonidan tantanali ravishda topshiriladi. Mukofotlanganlar 3 EKIH miqdorida bir yoʻla toʻlanadigan pul mukofoti oladilar.
Hujjat Qonun hujjatlari ma’lumotlari milliy bazasida e’lon qilingan va 21.03.2019 yildan kuchga kirdi.
