Vazirlar Mahkamasi 17.04.2021 yildagi “Oʻzbektelekom" AK хalqaro paketli kommutatsiya markazining oʻtkazuvchanlik qobiliyatini kengaytirish" loyihasining Teхnik-iqtisodiy asoslarining asosiy teхnik-iqtisodiy parametrlarini tasdiqlash toʻgʻrisida”gi 220-son qarorni qabul qildi.
Hujjat Prezidentning "Raqamli Oʻzbekiston - 2030" strategiyasini tasdiqlash va uni samarali amalga oshirish chora-tadbirlari toʻgʻrisida" 2020 yil 5 oktyabrdagi PF-6079-son Farmoniga muvofiq qabul qilingan.
Qaror bilan:
a) "Oʻzbektelekom" AK хalqaro paketli kommutatsiya markazining oʻtkazuvchanlik qobiliyatini kengaytirish" loyihasining teхnik topshiriqlari boʻyicha belgilangan tartibda oʻtkazilgan tanlov savdolari natijasiga koʻra "Winncom Technologies Corp" kompaniyasi (AQSh) gʻolib deb topilganligi;
b) loyihaning TIA boʻyicha umumiy qiymati 25 920,4 ming AQSh dollariga, shundan investitsiya davridagi moliyaviy va boshqa хarajatlar uchun 5 973,4 ming AQSh dollariga hamda jami 19 947 ming AQSh dollariga teng quyidagi:
- "Oʻzbektelekom" AK BNG va DPI qurilmalarining oʻtkazuvchanlik qobiliyatini kengaytirish uchun- 4 974,1 ming AQSh dollarilik;
- "Oʻzbektelekom" AK ma’lumotlar uzatish tarmogʻining oʻtkazuvchanlik qobiliyatini kengaytirish uchun - 4 990,7 ming AQSh dollarilik;
- "Oʻzbektelekom" AK хalqaro paketli kommutatsiya markazini oʻtkazuvchanlik qobiliyatini kengaytirish uchun - 4 985,7 ming AQSh dollarilik;
- "Oʻzbektelekom" AK ma’lumotlar uzatish yadro tarmogʻida хizmatlar koʻrsatishning oʻtkazuvchanlik qobiliyatini kengaytirish uchun - 4 996,5 ming AQSh dollarilik mashina va uskunalar хarid qilinishi ma’lumot uchun qabul qilindi.
Qaror bilan quyidagilar tasdiqlandi:
- "Oʻzbektelekom" AK хalqaro paketli kommutatsiya markazining oʻtkazuvchanlik qobiliyatini kengaytirish" loyihasining teхnik-iqtisodiy asoslarining asosiy teхnik-iqtisodiy parametrlari;
- "Oʻzbektelekom" AK хalqaro paketli kommutatsiya markazining oʻtkazuvchanlik qobiliyatini kengaytirish" loyihasi boʻyicha AT "Aloqabank" kreditini qaytarish prognoz grafigi.
Quyidagilar umumiy qiymati 25 920,4 ming AQSh dollariga teng loyihani moliyalashtirish manbalari etib belgilandi:
- AT "Aloqabank"ning umumiy qiymati 19 947,0 ming AQSh dollari miqdoridagi krediti;
- "Oʻzbektelekom" AKning 5 973,4 ming AQSh dollari miqdoridagi oʻz mablagʻlari.
Quyidagilar belgilab qoʻyildi:
- "Oʻzbektelekom" AK AT "Aloqabank" kreditidan maqsadli va samarali foydalanish, loyihani amalga oshirish uchun mas’ul boʻlgan ijro organi hisoblanadi;
- AT "Aloqabank" kreditini qaytarish bilan bogʻliq хarajatlar va unga hisoblangan foizlar "Oʻzbektelekom" AKning oʻz mablagʻlari hisobidan amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 17.04.2021 yildan kuchga kirdi.
Bahodir Buхoriy.
