29.12.2017 yildagi OʻRQ-454-son Qonun bilan Soliq kodeksiga kiritilgan oʻzgartirishlarga asosan mol-mulk soligʻi faqat koʻchmas mulkka solinadi.
Ma’lumot uchun: 2017 yilga qadar umumbelgilangan soliqlarni toʻlovchilar-yuridik shaхslar ularning balansida boʻlgan asosiy vositalarning oʻrtacha yillik qoldiq qiymatidan yuridik shaхslarning mol-mulkiga solinadigan soliqni toʻlashar edi.
Soliq solinadigan asosiy vositalar oʻz ichiga quyidagilarni olar edi: binolar va inshootlar, mashinalar va uskunalar, uzatish qurilmalari, transport va boshqa asosiy vositalar, jumladan moliyaviy ijara (lizing) shartnomasi boʻyicha olingan asosiy vositalar.
Oʻzbekiston Respublikasida doimiy muassasa orqali faoliyat koʻrsatadigan norezidentlarga doimiy muassasa faoliyati bilan bogʻliq asosiy vositalarga, shuningdek ularga mulk huquqi asosida tegishli boʻlgan koʻchmas mulkka soliq solingan.
Doimiy muassasa orqali faoliyat koʻrsatmaydigan norezidentlarga faqat Oʻzbekiston hududida boʻlgan ularga mulk huquqi asosida tegishli boʻlgan koʻchmas mulkka soliq solingan.
1.01.2018 yildan boshlab asosiy vositalardan faqat yuridik shaхslarning koʻchmas mulki, shu jumladan norezidentlarga mulk huquqi asosida tegishli boʻlgan koʻchmas mulkka mol-mulk soligʻi solinadi. Shuningdek, moliyaviy ijara (lizing) shartnomasi boʻyicha olingan koʻchmas mulkka ham soliq solinadi.
Koʻchar mulk (mashinalar va uskunalar, uzatish qurilmalari, transport va boshqa asosiy vositalar) soliq solish ob’yektlaridan chiqarib tashlandi. Koʻchar mulk qiymatidan soliq toʻlanmaydi.
Bu – muhim! Soliq solish ob’yektlari roʻyхatida normativ (belgilangan) muddatda qurilishi tugallanmagan ob’yektlar va ishga tushirilmagan asbob-uskunalar qoldi. Ilgarigidek, yuridik shaхslar mol-mulkiga solinadigan soliq mol-mulkdan ikki baravar stavka boʻyicha toʻlanadi.
2018 yil uchun yuridik shaхslar mol-mulkiga solinadigan soliq stavkasi 2017 yil darajasida saqlanib qolindi va 5%ni tashkil etadi (29.12.2017 yildagi PQ-3454-son qarorga qarang).
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Muzaffar Mirzagʻaniyev.
