Вазирлар Маҳкамасининг 16.01.2018 йилдаги 29-сон қарори билан Эркин иқтисодий зоналар ҳудудида жойлаштириш учун инвестиция лойиҳаларини танлаб олиш ва эркин иқтисодий зоналар қатнашчиларини рўйхатдан ўтказиш тартиби тўғрисидаги низом тасдиқланди.
Қандай лойиҳалар ЭИЗга жойлаштирилиши мумкин
Ҳужжат билан ЭИЗ ҳудудида инвестиция лойиҳаларини жойлаштиришда мажбурий мезонлар тасдиқланди:
1 – маҳаллийлаштириш лойиҳалари учун қонунчиликда ўрнатилган параметрларга мувофиқ импорт ўрнини босувчи, юқори технологияли ишлаб чиқаришни ташкил этиш;
2 – экспорт ҳажми ишлаб чиқариш фаолиятининг иккинчи йили камида 20%, учинчи ва кейинги йилларда 30%дан кам бўлмаган даражада;
3 – маъмурий кенгашлар томонидан белгиланадиган даражада янги иш ўринлари ташкил қилиш, жумладан касаба уюшмалари Кенгаши Федерацияси томонидан тақдим этиладиган рўйхат бўйича ишсизларни ишга қабул қилиш учун 10%ли квота ўрнатиш;
4 – ташкил этиладиган ташкилотнинг штатдаги ходимларини жалб этилган ходимлар умумий сонининг камида 95%и миқдорида Ўзбекистон фуқаролари билан тўлдириш, уларга тажриба орттиришдан ва малака оширишдан ўтиш имкониятини бериш.
Қандай ҳужжатлар зарур
ЭИЗ ҳудудида инвестиция лойиҳасини жойлаштириш учун инвестор Дирекцияга намунавий шакл бўйича тўлдирилган инвестиция буюртманомасини тақдим этади. Инвестиция буюртманомасига қуйидагилар илова қилинади:
- юридик шахснинг (инвесторнинг) рўйхатдан ўтказилганлиги тўғрисидаги маълумот ёки ушбу инвесторнинг фаолиятини тасдиқловчи бошқа ҳужжат;
- тавсия қилинаётган инвестиция лойиҳасининг бизнес-режаси;
- инвесторнинг тегишли соҳадаги ва/ёки шунга ўхшаш лойиҳаларни амалга оширишдаги иш тажрибаси мавжудлигини тасдиқловчи маълумот. Агар бундай тажриба бўлмаса, инвестиция лойиҳасини амалга оширишга жалб этаётган технологик ҳамкорлари тўғрисидаги маълумотни тақдим этади;
- инвесторнинг охирги 3 йилдаги молия-хўжалик фаолияти тўғрисида маълумот. Агарда инвестиция буюртманомасини топшириш пайтида инвестор:
– 1 йилдан 3 йилгача хўжалик фаолиятини юритаётган бўлса, ўзининг ҳақиқатда фаолият юритган даври учун фаолияти тўғрисидаги маълумот тақдим этилади;
– молия-хўжалик фаолиятини юритмаган ёки бир йилдан кам юритган бўлса, инвесторнинг биттадан кам бўлмаган муассисининг молия-хўжалик фаолияти тўғрисидаги маълумотларни тақдим этади.
Буюртманомани кўриб чиқиш ва келишиш, инвестициялаш тўғрисидаги битим
Тақдим этилган ҳужжатлар Дирекция томонидан 2 иш куни мобайнида кўриб чиқилади. Талаблар бузилган ҳолда тақдим этилган инвестиция буюртманомалари, камчиликлари кўрсатилган ҳолда, кўриб чиқилмасдан инвесторга қайтарилади, қолганлари тегишли хулосалар билан ЭИЗ маъмурий кенгашига киритилади.
Фармацевтика соҳасидаги инвестиция лойиҳаси амалга ошириш учун Соғлиқни сақлаш вазирлигининг хулосаси талаб этилади (хулоса олиш учун ҳужжатлар ЭИЗ Дирекцияси томонидан юборилади).
Қиймати эквивалентда 5,0 млн АҚШ долларидан юқори бўлган инвестиция лойиҳалари эркин иқтисодий зоналар ва кичик саноат зоналари маъмурий кенгашларининг фаолиятини мувофиқлаштириш бўйича Республика кенгаши билан келишилади (Президентнинг 25.10.2017 йилдаги ПҚ–3356-сон қарори билан ташкил этилган).
Инвестиция буюртманомаси маъмурий кенгаш томонидан маъқулланганидан кейин ЭИЗ Дирекцияси сайтида инвестициялаш тўғрисидаги битим лойиҳаси жойлаштирилади. У инвесторга кўриб чиқиш учун юборилиши мумкин. Битимнинг намунавий шакли тасдиқланган, бироқ инвестиция лойиҳасининг хусусиятига боғлиқ ҳолда ўзгартирилиши мумкин.
Ҳужжат Қонун ҳужжатлари маълумотлари миллий базасида расман эълон қилинган ва 18.01.2018 йилда кучга кирди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Олег Заманов.
