25.02.2025 йилдаги ЎРҚ-1037-сон Қонун билан Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепцияси тасдиқланди.
Концепция диний соҳадаги давлат сиёсатининг мақсадлари, вазифалари, тамойиллари ва устувор йўналишларини белгилайди.
Диний соҳадаги давлат сиёсатининг мақсади – фуқароларнинг виждон эркинлиги ҳуқуқини амалга ошириш учун тенг шароитлар яратиш, турли динлардаги диний ташкилотлар ўртасида ўзаро тушуниш ва ҳурматни қўллаб-қувватлаш, конфессиялараро тотувликни мустаҳкамлаш, жамиятда диний бағрикенглик ва дунёвийликни таъминлаш.
Диний соҳадаги давлат сиёсатининг асосий вазифалари:
- жинси, ирқи, миллати, тили, дини, эътиқоди, ижтимоий келиб чиқиши, ижтимоий мавқеидан қатъи назар, фуқароларнинг эркинлиги қонун олдида тенглигини таъминлаш ҳамда конституциявий ҳуқуқ ва эркинликларини камситилишига йўл қўймаслик чораларини кўриш;
- кўп миллатли ва кўпконфессияли Ўзбекистон халқининг бирлиги ва бирдамлигини, урф-одатларига нисбатан ҳурмат руҳини мустаҳкамлаш, уларнинг ривожланиши учун тенг шарт-шароитлар яратиш;
- фуқароларнинг жамият ҳаётида фаол иштирок этиши учун тенг ҳуқуқий шарт-шароитлар яратиш;
- фуқароларнинг динга муносабатидан қатъи назар, диний қарашларни мажбуран сингдиришга йўл қўймаган ҳолда, уларнинг виждон эркинлигига бўлган конституциявий ҳуқуқларини амалга ошириши учун шарт-шароитлар яратиш;
- давлат ўзининг ички ва ташқи сиёсатини амалга оширишида конституциявий нормаларга мувофиқ дунёвийликка таяниш;
- конституциявий нормаларга мувофиқ давлат бошқаруви органлари, Қуролли Кучлар ва ҳуқуқни муҳофаза қилувчи органлар, фуқароларнинг ўзини ўзи бошқариш органлари фаолиятини дунёвийлик асосида тартибга солиш;
- жамиятда диний бағрикенглик ва қонунийликни қарор топтириш борасида фуқароларнинг фаол фуқаролик позициясини мустаҳкамлаш бўйича изчил чора-тадбирларни амалга ошириш.
Ҳужжат Қонун ҳужжатлари маълумотлари миллий базасида эълон қилинган ва 26.02.2025 йилдан кучга кирди.
Лола Абдуазимова
