Ҳайъатдаги келишмовчиликлар тўғрисида Ҳукуматга хабар берилади

Ҳужжатда кўрсатилишича, Жисмоний тарбия ва спорт давлат қўмитаси жисмоний тарбия ва спорт соҳасида ягона давлат сиёсати амалга оширилишини таъминловчи давлат бошқаруви органи ҳисобланади ва ўз фаолиятида Вазирлар Маҳкамасига ҳисобот беради.

Қўмитага Президент томонидан лавозимга тасдиқланадиган ва лавозимдан озод қилинадиган раис бошчилик қилади. Шунингдек, давлат раҳбари раиснинг биринчи ўринбосари ва икки нафар ўринбосарини тайинлайди.

Ҳудудий бўлинмалар раҳбарлари қуйидаги тартибда лавозимга тайинланади:

• Қорақалпоғистон Республикаси Жисмоний тарбия ва спорт давлат қўмитаси раиси - Жўқори Кенгаш томонидан Қўмита раиси билан келишган ҳолда;
• вилоятлар ва Тошкент шаҳри жисмоний тарбия ва спорт бошқармалари бошлиқлари - тегишли равишда вилоятлар ва Тошкент шаҳри ҳокимлари билан келишган ҳолда Қўмита раиси томонидан.

Бундан ташқари, давлат органи таркибида ҳайъат ташкил этилиб, унинг аъзолари сони ва шахсий таркиби Вазирлар Маҳкамаси томонидан Қўмита раисининг тақдимномасига биноан тасдиқланади. Ҳайъат қуйидагилар билан боғлиқ масалаларни кўриб чиқади:

• Қўмита фаолиятининг асосий йўналишларини тайёрлаш ва амалга ошириш;
• Қўмита номенклатурасига кирадиган лавозимларга кадрларни танлаш, жой-жойига қўйиш, тайёрлаш ва қайта тайёрлаш;
• ижро интизомини мустаҳкамлаш ва Президентнинг ҳужжатларида ва Ҳукумат қарорларида белгиланган вазифалар ўз вақтида ва сифатли амалга оширилишини таъминлаш учун раҳбарлар ва мутахассисларнинг шахсий масъулиятини ошириш.

Мажлисда кўриб чиқилаётган масалалар бўйича қарорлар (ҳайъат унинг мажлисида таркибининг ярмидан кўпи қатнашган тақдирда ваколатли бўлади) оддий кўпчилик овоз билан қабул қилинади. Раис ва ҳайъат аъзолари ўртасида келишмовчиликлар пайдо бўлган тақдирда раис мустақил равишда қарор қабул қилади, келиб чиққан келишмовчиликлар тўғрисида Ҳукуматга ахборот беради. Ҳайъат аъзолари ҳам ўз фикр-мулоҳазаларини Вазирлар Маҳкамасига хабар қилишлари мумкин.

Мазкур ҳужжатнинг тўлиқ матни ва у билан боғланган бошқа қонун ҳужжатларига шарҳлар ва ҳаволалар билан яқин кунларда «Ўзбекистон Республикаси Қонунчилиги» ахборот-қидирув тизимида танишиш мумкин.

 

Олег ЗАМАНОВ, 

экспертимиз.