Институтнинг бино ва иншоотларини қуриш учун Зангиота тумани, Эркин қишлоғи, Қуёшли МФЙ ҳудудида 3,5 гектар ажратилди (18.12.2019 йилдаги 1011-сон ВМҚга қаранг).
Институт ФВВ тизимига ўтказилган Ёнғин хавфсизлигини илмий-техник таъминлаш маркази ҳамда Ёнғин хавфсизлиги масалалари бўйича фундаментал ва амалий тадқиқотлар маркази негизида ташкил этилди.
Қуйидагилар унинг асосий вазифалари ва фаолиятининг йўналишлари этиб белгиланди:
- ёнғин хавфсизлигини таъминлаш, фавқулодда вазиятларнинг олдини олиш ва уларни бартараф этиш соҳасида амалий илмий тадқиқотлар ҳамда инновацион лойиҳаларни амалга ошириш ва бу борада устувор йўналишларни шакллантиришда иштирок этиш;
- қурилиш конструкциялари, модда ва материалларнинг ёнғин хавфлилигини тадқиқ этиш, ёнғин-техник ва қуткарув учун мўлжалланган маҳсулотларни синаш ҳамда ёнғинлардан ва бошқа турдаги фавқулодда вазиятлардан ҳимоя қилиш тизимларининг мувофиқлигини баҳолаш;
- ёнғинларни ва бошқа фавқулодда вазиятларни тадқиқ қилиш ҳамда ёнғин-техник экспертизаларини ўтказиш;
- ёнғин хавфсизлиги, фавқулодда вазиятларнинг олдини олиш ва уларни бартараф этиш ҳамда ёнғин-қутқарув бўлинмалари шахсий таркибининг соғлиғи ва меҳнат муҳофазасини таъминлаш соҳасидаги техник регламентлар, стандартлар, нормалар, қоидалар ва бошқа норматив ҳужжатларни ишлаб чиқиш ва такомиллаштириш;
- республикадаги таълим, илмий-тадқиқот муассасалари ва ишлаб чиқариш ташкилотлари билан ҳамкорликни амалга ошириш ҳамда хориий мамлакатларнинг илғор илмий-тадқиқот муассасалари билан халқаро алоқаларни ривожлантириш.
ИТИ ҳар йили бюджетдан ажратиладиган маблағлар, ФВВнинг бюджетдан ташқари маблағлари, давлат илмий-техника дастурларини амалга ошириш учун ажратиладиган бюджетлар маблағлари, пуллик хизматлар кўрсатишдан тушган маблағлар, хорижий грантлар, тақиқланмаган бошқа манбалар ҳисобига молиялаштирилади.
Комплекс ташкилий чора-тадбирлар, жумладан моддий-техник базани мустаҳкамлаш, шунингдек илмий-тадқиқот ишларини, синов ўтказиш ва сертификатлаштириш, ёнғин ва фавқулодда вазиятларни тадқиқ қилиш ва уларни экспертизадан ўтказиш тизимларини ривожлантириш чора-тадбирлари тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 19.12.2019 йилдан кучга кирди.
Олег Заманов.
