Вазирлар Маҳкамасининг 10.08.2022 йилдаги «Ихтирочилик ва рационализаторлик фаолиятини қўллаб-қувватлаш чора-тадбирлари тўғрисида»ги 440-сон қарори қабул қилинди.
Қарорга мувофиқ нодавлат нотижорат ташкилот шаклидаги Ўзбекистон ихтирочилар ва рационализаторлар жамияти ташкил этилади.
Жамиятнинг асосий вазифалари қуйидагилардан иборат:
- республика иқтисодиётининг барча тармоқларида ихтирочилик фаолиятини ривожлантириш;
- давлат бошқарувчи органлари ҳамда устав фондида давлат улуши 50% ва ундан юқори бўлган ташкилотларнинг ихтирочилик фаолиятини рағбатлантириш;
- кўргазмалар ва кўрик-танловлар ўтказиш.
2022 йилдан бошлаб ҳар йили ҳудудлар, тармоқлар ва соҳалар кесимида ихтирочилик ва рационализаторлик бўйича кўрик-танловлар ўтказилади. Танловлар ғолибларига қуйидаги миқдорда пул мукофотлари берилади:
- 1-ўрин – 300 БҲМ;
- 2-ўрин – 250 БҲМ;
- 3-ўрин – 200 БҲМ.
Ушбу маблағлар Илм-фанни молиялаштириш ва инновацияларни қўллаб-қувватлаш жамғармаси ҳисобидан қопланади.
Ҳужжат Қонун ҳужжатлари маълумотлари миллий базасида эълон қилинган ва 10.08.2022 йилдан кучга кирди.
Лола Абдуазимова.
