Президентнинг 27.03.2024 йилдаги ПҚ-140-сонли “Халқаро тараққиёт уюшмаси иштирокида "Ўзбекистонда барқарор ўрмон ландшафтларини тиклаш" лойиҳасини амалга ошириш чора-тадбирлари тўғрисида”ги қарори қабул қилинди.
10.04.2023 йилдаги Ўзбекистон Республикаси билан Халқаро тараққиёт уюшмаси ўртасида имзоланган молиялаштириш битими доирасида "Ўзбекистонда барқарор ўрмон ландшафтларини тиклаш" лойиҳасини амалга ошириш учун 5 йиллик имтиёзли давр билан 30 йил муддатга жами 142 миллион АҚШ доллари миқдорида қарз маблағлари ажратилади. Шунингдек, Progreen траст жамғармаси ҳамда Корея Республикасининг KWPF жамғармаси ўртасида тузилган грант битимлари доирасида жами 11 млн АҚШ доллари микдорида грантлар жалб этилади.
Лойиҳанинг умумий қиймати 205,45 млн АҚШ долларини, шу жумладан Лойиҳадаги Ўзбекистон Республикасининг улуши 52,45 миллион АҚШ долларини ташкил этади.
Экология, атроф-муҳитни муҳофаза қилиш ва иқлим ўзгариши вазирлиги ҳамда Ўрмон хўжалиги агентлиги Лойиҳанинг ўз вақтида ва тўлиқ амалга оширилиши, мувофиқлаштирилиши ва бошқарилиши ҳамда жалб этилган қарз маблағлари ва грантлардан мақсадли ва самарали фойдаланилиши учун масъул ижро этувчи органлар ҳисобланади.
Ҳужжат билан қуйидагилар тасдиқланди:
● "Ўзбекистонда барқарор ўрмон ландшафтларини тиклаш" лойиҳасининг техник-иқтисодий параметрлари;
● "Ўзбекистонда барқарор ўрмон ландшафтларини тиклаш" лойиҳасини амалга ошириш доирасида Халқаро тараққиёт уюшмасининг қарз маблағларидан фойдаланиш, уни қайтариш, комиссия ва фоиз тўловларини тўлашнинг прогноз жадвали;
● "Ўзбекистонда барқарор ўрмон ландшафтларини тиклаш" лойиҳасини амалга ошириш бўйича "йўл харитаси";
● лойиҳа доирасида Жиззах, Наманган, Қашқадарё, Самарқанд, Сирдарё ва Сурхондарё вилоятларида амалга ошириладиган чора-тадбирлар.
Ҳужжат Қонун ҳужжатлари маълумотлари миллий базасида эълон қилинган ва 28.03.2024 йилдан кучга кирди.
Лола Абдуазимова
