Иқтисодиёт ва молия вазирининг буйруғи (11.02.2025 й. АВ рўйхат рақами 3607-сон) билан чет эл валютасига сотиб олинадиган турли хил активларни баҳолаш тартибига ўзгартиришлар киритилди. Ўзгартиришлар бухгалтерия ҳисобининг учта миллий стандартига – 4, 5 ва 7-сонли стандартларга тегишли бўлди, деб тушунтиради buxgalter.uz эксперти.
Стандартларга қуйидаги аниқликлар киритилди:
- 4-сонли БҲМС "Товар-моддий захиралар"нинг 24-бандига: товар-моддий захиралар тўлиқ ёки қисман чет эл валютасидаги олдиндан тўланган депозит ҳисобидан сотиб олинганда, уларнинг қиймати депозит киритилган санадаги МБ курси бўйича тан олинади;
- 5-сонли БҲМС "Асосий воситалар"нинг 16-бандига: асосий воситалар тўлиқ ёки қисман чет эл валютасида олдиндан тўланган кредит ҳисобидан сотиб олинганда, уларнинг қиймати кредит тўланган санадаги МБ курси бўйича ушбу кредит суммасига тенг миқдорда тан олинади;
- 7-сонли БҲМС "Номоддий активлар"нинг 17-бандига: номоддий активлар тўлиқ ёки қисман чет эл валютасида олдиндан сўндирилган кредит ҳисобидан сотиб олинганда, уларнинг қиймати кредит сўндирилган санадаги МБ курси бўйича тан олинади.
Бу ўзгартиришлар 22-сонли БҲМС "Чет эл валютасида ифодаланган активлар ва мажбуриятларни ҳисобга олиш"нинг 12-бандида белгиланган нормага мос келади: "Активлар, ишлар ва хизматлар чет эл валютасида тўлиқ ёки қисман тўланган бўнак ҳисобидан сотиб олинганда, уларнинг қиймати ушбу бўнак миқдорига тенг суммада бўнак тўланган санадаги Марказий банк курси бўйича тан олинади.
Активлар, ишлар ва хизматлар чет эл валютасида тўлиқ ёки қисман олинган бўнак ҳисобидан сотилганда, улар бўйича даромад ушбу бўнак миқдорига тенг суммада бўнак олинган санадаги Марказий банк курси бўйича тан олинади".
Киритилган ўзгартиришлар валюта операцияларининг бухгалтерия ҳисобини такомиллаштириш ва молиявий ҳисоботларда активлар қийматини янада аниқроқ акс эттиришни таъминлашга қаратилган. Ташкилотлар янги талабларни диққат билан ўрганиб чиқишлари ва амалий фаолиятда уларни тўғри қўллашни таъминлашлари зарур.
Юлия ТАРШИЛОВА тайёрлади
