Президентнинг 28.03.2025 йилдаги "Қишлоқ хўжалигида ердан фойдаланиш самарадорлигини ошириш ва маҳсулот етиштириш ҳажмини кўпайтириш бўйича қўшимча чора-тадбирлар тўғрисида"ги ПҚ-131-сон қарори қабул қилинди.
Ҳар йили солиқ ҳисоботларида пахтадан 50 центнер/гектар, ғалладан 80 центнер/гектардан юқори ҳосил олганини акс эттирган фермер хўжаликлари ва бошқа қишлоқ хўжалиги корхоналарига келгуси йилда:
- ижарага олинган жами ер майдонининг 25 фоизига алмашлаб экиш усулида чорва учун озуқа, сабзавот, полиз, картошка, мойли ва дуккакли экинларни экиш (жойлаштириш) кафолатланади;
- Ўзбекистон фермерлари кенгашига аъзолик бадали пахта хомашёси бўйича биржада эълон қилинадиган бошланғич нархдан ва доннинг шаклланган ўртача нархидан 0,3 фоиз миқдорида белгиланади;
- ер солиғини ҳисоблашда базавий ставкага нисбатан мутаносиб равишда уч каррагача камайтирувчи коэффициентлар қўлланади (Президентнинг 03.02.2025 й. ПФ-18-сон Фармони).
Қишлоқ хўжалиги кооперативларига аъзо бўлган фермер хўжаликларининг 50 фоизига пахта етиштириш учун Қишлоқ хўжалигини давлат томонидан қўллаб-қувватлаш жамғармасининг ресурслари ҳисобидан 50 фоизлик мол-мулк гарови, хусусан, ерга ижара ҳуқуқи гарови билан имтиёзли кредит ажратилади.
Қишлоқ хўжалиги кооперативларига аъзо бўлган фермер хўжаликлари етиштирган пахта хомашёсини тўғридан-тўғри харид қиладилар. Бунда тўғридан-тўғри шартномалар "Ўзбекистон республика товар-хом ашё биржаси" АЖнинг ахборот порталида тузилади ва улар бўйича тўловлар биржанинг ҳисоб-китоб-клиринг операцияларини ўтказиш қоидалари асосида амалга оширилади.
Қишлоқ хўжалигига мўлжалланган барча турдаги ерларни ижарага беришда:
- электрон онлайн аукцион савдосини ўтказиш тўғрисидаги хабарномани эълон қилиш муддати 15 кундан 5 кунга, такрорий савдоларда — 5 кундан 1 кунга қисқартирилади;
- такрорий савдоларда фақат бир нафар талабгордан ариза келиб тушган тақдирда, унга ушбу савдода эълон қилинган нархда лотни ихтиёрий сотиб олиш таклиф этилади;
- ҳар такрорий савдода лот нархи 10 фоиздан босқичма-босқич бошланғич нархнинг 20 фоизига тушганига қадар пасайтирилади.
2025 йил 1 апрелдан бошлаб ўтказиладиган электрон онлайн аукцион савдоларида ер участкасига ижара ҳуқуқини олиш учун тўловларни бўлиб-бўлиб тўлаш ва тўлов тўлиқ тўланганда чегирма бериш тартиби бекор қилинади.
2025-2026 йилларда электрон онлайн аукцион савдоларига чиқариладиган қишлоқ хўжалигига мўлжалланган ерлар жами майдонининг ўртача 10-20 фоизи чорва учун озуқа экинларини экиш шарти билан савдога чиқарилади.
Ҳужжат Қонун ҳужжатлари маълумотлари миллий базасида эълон қилинган ва 31.03.2025 йилдан кучга кирди.
