Вазирлар Маҳкамасининг 02.04.2025 йилдаги «Автомобиль транспортида йўловчиларни ташиш фаолиятини тартибга солиш бўйича қўшимча чора-тадбирлар тўғрисида»ги 200-сон қарори қабул қилинди.
Юридик шахсларга тегишли йўналишсиз таксилар учун қуйидагиларга рухсат этилади:
- «Тўхташ тақиқланган» йўл белгиси амал қиладиган ҳудудда, шу жумладан аэропортлар ва вокзалларга туташ ҳудудларда йўловчиларни чиқариш ва тушириш учун тўхташ;
- аэропортлар, темир йўл вокзаллари, автовокзаллар, қурилиш материаллари бозорлари, деҳқон ва буюм бозорлари ҳамда устав фондида (устав капиталида) давлат улуши 50% ва ундан ортиқ бўлган савдо комплексларининг пулли автотураргоҳларига йўловчиларни чиқариш ва тушириш учун бепул кириш;
- йўналишли транспорт воситалари учун ажратилган махсус ҳаракатланиш бўлаги бўйлаб ҳаракатланиш.
Йўловчи ташиш учун мўлжалланган йўналишсиз таксиларни бошқаришга «В» тоифасига эга бўлган, 21 ёшга тўлган, тиббий кўрикдан ўтган, камида 3 йил ҳайдовчилик стажига эга бўлган ва Ўзбекистон фуқароси бўлган шахслар қўйилади.
2025 йил 15 апрелдан 2026 йил якунига қадар Тошкент шаҳрида тажриба тариқасида ўзини ўзи банд қилган шахслар томонидан ҳайдовчидан ташқари саккизтадан кўп бўлмаган ўриндиққа ва юқори қулайликка эга автотранспорт воситаларида йўналишсиз таксилар фаолиятига рухсат берилади (транспорт воситаларининг турлари Транспорт вазирлиги томонидан тасдиқланади). Бунда ўзини ўзи банд қилган ташувчиларга лицензия варақаси берилганлиги учун давлат божи йилига БҲМнинг 3 баравари миқдорида ундирилади.
Ҳужжат Қонун ҳужжатлари маълумотлари миллий базасида эълон қилинган ва 02.04.2025 йилдан кучга кирди.
Собир Нурбердиев
