17.04.2025 йилдгиа «Тадбиркорлик субъектларини молиявий қўллаб-қувватлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги ЎРҚ-1058-сон Қонун қабул қилинди.
Энди резидентлар ўртасидаги валюта операциялари мижознинг (кредиторнинг) контрагенти норезидент бўлган тақдирда, кредит ташкилотлари томонидан пул талабномасидан бошқа шахс фойдасига воз кечиш эвазига молиялаш операцияларига рухсат этилади (илгари бундай норма мавжуд эмас эди). Ўзгартиш «Валютани тартибга солиш тўғрисида»ги Қонунга киритилди.
Кредит ташкилоти бўлмаган шахслар томонидан ташкил этилган электрон факторинг платформаларининг ахборот тизимлари хавфсизлигига, киберхавфсизлигига ва уларни IT-аудитдан ўтказишга доир талаблар белгиланди. Тегишли қўшимчалар «Ўзбекистон Республикасининг Марказий банки тўғрисида»ги Қонунга киритилди.
Шунингдек, Марказий банк қуйидаги фаолият турларини амалга ошириш учун рухсат берувчи ҳужжатларни беради:
- кафолатлар бериш ташкилоти;
- факторинг ташкилоти.
Қуйидаги фаолият турларини (ҳаракатларни) амалга оширишда Марказий банкни хабардор қилиш зарур:
- факторинг ташкилотининг филиалини очиш ёки ёпиш;
- жисмоний ва юридик шахслар, шу жумладан тегишинча яқин қариндошлари ҳамда улар билан боғлиқ бўлган шахслар билан биргаликда ҳаракат қилувчи жисмоний ва юридик шахслар, шунингдек, норезидентлар томонидан бир ёки бир нечта битим натижасида нобанк кредит ташкилотининг устав фондидаги (устав капиталидаги) ўн фоиздан йигирма фоизгача ташкил этадиган улушини бевосита ёки билвосита олиш.
Факторинг бўйича қонунчилик базаси яратилмоқда. Шундай қилиб, Фуқаролик кодексига киритилган қўшимчаларда пул талабномасидан бошқа шахс фойдасига воз кечиш эвазига молиялаш (факторинг) тўғрисидаги умумий қоидалар белгиланган.
Пул талабномасидан воз кечиш гаров реестрида воз кечиш тўғрисидаги хабарнома рўйхатга олингандан сўнг учинчи шахсларга нисбатан кучга киради. Агар бир мижоз бир пул талабномасидан ёки унинг бир қисмидан бир неча марта воз кечса, молия агентларининг талаблари навбат билан қондирилади.
Ҳужжат Қонун ҳужжатлари маълумотлари миллий базасида эълон қилинган ва 18.04.2025 йилдан кучга кирди.
