Вазирлар Маҳкамасининг 15.10.2022 йилдаги «Ўзбекистон Республикасида мувофиқликни баҳолаш органларини қўллаб-қувватлашнинг қўшимча чора-тадбирлари тўғрисида»ги 605-сон қарори қабул қилинди.
Президентнинг 06.04.2022 йилдаги «Ташқи савдо фаолияти иштирокчиларини қўллаб-қувватлашнинг қўшимча чора-тадбирлари тўғрисида»ги ПФ-97-сон Фармонига мувофиқ, мувофиқликни баҳолаш органларини халқаро ILAC/IAF ташкилотлари аъзоси ҳисобланган аккредитация идораси томонидан аккредитациядан ўтказиш билан боғлиқ харажатлар Экспортни рағбатлантириш агентлиги томонидан қоплаб берилади.
Қарорда белгиланишича, халқаро аккредитациядан ўтказиш билан боғлиқ харажатлар амалга ошириладиган ишларнинг ҳар бир бирлиги учун эквивалентда $200 дан кўп бўлмаган миқдорда миллий валютада қоплаб берилади.
Харажатлар қуйидагиларга қоплаб берилади:
- аккредитация қилинган инспекция органларига;
- синов ва калибрлаш лабораторияларига (марказларига);
- маҳсулотлар, хизматлар, менежмент тизимлари ҳамда ходимларни сертификатлаш органларига.
Харажатлари қоплаб берилган мувофиқликни баҳолаш органининг аккредитация гувоҳномаси даврий баҳолашларда бекор қилинса, ушбу органга келгусида халқаро аккредитациядан ўтказиш билан боғлиқ харажатлар қоплаб берилмайди.
Ҳужжат Қонун ҳужжатлари миллий маълумотлар базасида эълон қилинган ва 15.10.2022 йилдан кучга кирган.
Лола Абдуазимова.
.png)
