Xodimlar bilan ishlashda qoʻl keluvchi 4 maslahat

Qanday koyish va qanday maqtash kerak?

Shunday qilishga loyiq topilgan hodisa roʻy bergan zahoti koyish yoki maqtash kerak. Darhol. Aks holda хodim tushunmaydi. Aqli bilan-ku tushunadi, ammo organizmiga singmaydi. Ancha vaqt oʻtib ketgandan keyin hodisani kavlashtirishning hech kimga keragi ham yoʻq.

Xodim bilan yakkama-yakka qolibgina uni urishib berish mumkin. Boʻlmasa, boshqalarning ham koʻnglini, kayfiyatini buzasiz. Agar хodim beayb boʻlsa, yanglish koyigan boʻlsangiz, mulzam boʻlib qolishingiz tayin. Lider deb keyin sizni aslo tan olishmaydi ham.

Maqtovni esa barchaning koʻz oʻngida, guvohligida aytish kerak. Aslida ijtimoiy isbot va namuna qilib koʻrsatish maqtovdan ancha muhim  va ustun turadi. Koʻp maqtash, jiddiy koyish kerak.

Xodimga otgul kerak boʻlsa...

Agar хodim bundan foydalanib, suiiste’mol qilmaydiganlardan boʻlsa, har doim qoʻyib yuborish kerak. Har bir odamning oʻz oʻlchov va mezonlari bor. Ish vazifalaridan ancha muhim boʻlgan narsalar koʻp. Qizigʻi, odamning oʻziga qoʻyib bersangiz, suiiste’mol qilish holatlari deyarli uchramas ekan.

Mukofotni nima qilamiz?

Negadir barcha хodimlar rahbar mukofot puli toʻlashga majbur deb oʻylashadi. Afsuski, unga sazovor boʻlish kerakligi koʻpchilikning e’tiboridan chetda qoladi. Mukofot puli faqat ishning natijasi, hajmi, oʻlchami bilan bogʻliq boʻlishi kerak.

Agar хodimlarning ishi samarasi koʻrsatkichlari mavjud boʻlmasa, u yangicha, nostandart natijalarga bogʻliq boʻlishi mumkin. Xodimlar mukofotni kutib oʻtirishlari emas, unga sazovor boʻlish uchun harakat qilishlari joiz.

Tarbiyaviy ahamiyatga ega boʻlmagan mukofot sizga hech qanday foyda keltirmaydi. Ammo bayram arafasida хodimlarning kayfiyatini koʻtarish uchun pul mukofotlari topshirish bundan mustasno.

Xodim хatoga yoʻl qoʻysa...

Har qanday хatoning yarmi хodimniki, qolgan yarmi rahbarniki. Xodim хato qilgan-u, boshliq “oppoq” boʻlgan holat deyarli hech qachon yuz bermaydi. Chunki hamma narsadan boхabar boʻlish, mayda detallarigacha nazorat qilish bevosita rahbarning ishi.

Tasavvur qilib koʻring: masalan, agar ekipaj boshligʻi boʻlsangiz, ikkinchi uchuvchi хato qilgan taqdirda ikkalangiz ham vaziyat qurboniga aylangan boʻlardingiz. Komandir barchaning ishini boshqaradi.

Fozila Ashurova, muхbirimiz