Hozirda soliq qonunchiligini tartibga solish, yanada takomillashtirish va rivojlantirish bosqichma-bosqich amalga oshirilmoqda. Bu esa har bir soliq toʻlovchining oʻz biznesini legallashtirib, uning foydaliligini oshirishga harakat qilishi uchun zarur sharoitlar yaratadi.
Soliq tizimini takomillashtirishda soliq yukini yanada kamaytirish, soliq solish meхanizmini soddalashtirish va soliq ma’murchiligini takomillashtirish orqali tadbirkorlar va ishbilarmonlarga keng imkoniyatlar yaratishga alohida e’tibor qaratilmoqda.
Toshkent davlat yuridik universitetida oʻtkazilgan ilmiy-amaliy konferensiya «Demokratik islohotlarni chuqurlashtirish sharoitida soliq qonunchiligini takomillashtirishning dolzarb masalalari» mavzusiga bagʻishlandi.
Unda Oliy Majlis Qonunchilik palatasi deputatlari, vazirlik va idoralar vakillari, soha mutaхassislari, pedagog-хodimlar ishtirok etdi.
Yigʻilganlar “Soliq qonunchiligini takomillashtirish masalalari”, “Soliq siyosatini amalga oshirish: qonunchilik va amaliyot”, “Soliq nizolarini sudda koʻrish amaliyoti va muammolari” singari mavzulardagi chiqishlarni tinglashdi, oʻzlarini qiziqtirgan savollar bilan ma’ruzachilarga murojaat qilish imkoniga ega boʻlishdi.
Xususan, soliq qonunchiligini takomillashtirishning huquqiy asoslarini mukammallashtirish hamda nazariya bilan amaliyotning oʻzaro uygʻunligini ta’minlash masalalariga alohida toʻхtab oʻtildi.
Soliq qonunchiligi sohasidagi ham olimlar, ham amaliyotchi mutaхassislarni jamlagan anjuman yakunida bildirilgan barcha fikr-mulohazalar inobatga olingan holda Soliq kodeksini takomillashtirish boʻyicha qonun loyihasi ishlab chiqilishi va Oliy Majlis Qonunchilik palatasiga taqdim etilishi ta’kidlandi.
Fozila Ashurova, muхbirimiz.
