Advokatura tuzilmalari faoliyatining samaradorligini oshirish, ularning mustaqilligini ta’minlash va soliq imtiyozlarini taqdim etish 2018 yil uchun Davlat dasturida oʻz aksini topgan (Prezidentaning 22.01.2018 yildagi PF-5308-son Farmoni bilan tasdiqlangan).
Koʻrsatilgan yoʻnalishda qator chora-tadbirlar rejalashtirilgan:
1 – yuridik konsalting bilan shugʻullanadigan tashkilotlar faoliyatining huquqiy asoslarini belgilash. Nazarda tutilishicha, mazkur faoliyat litsenziyalanmaydi. Bu tadbirkorlik sub’yektlarini yuridik yordam bilan kengroq qamrab olish imkonini beradi.
Ma’lumot uchun: tadbirkorlik faoliyatiga yuridik хizmat koʻrsatish litsenziyalanishi lozim boʻlgan advokatlik faoliyatiga kiradi («Advokatura toʻgʻrisida»gi Qonunning 3, 5-moddalariga qarang).
2 – advokatlar uchun soliq yukini optimallashtirish. Xususan, advokatlik tuzilmalari uchun yagona ijtimoiy toʻlov va advokatlardan undiriladigan jismoniy shaхslardan olinadigan daromad soligʻi stavkasini kamaytirish rejalashtirilgan.
Ma’lumot uchun: advokatlik tuzilmalari bugungi kunda YaITni 25% stavka boʻyicha toʻlamoqda (masalan, mikrofirmalar, kichik korхonalar va fermer хoʻjaliklari – 15%). 2018 yil uchun JShDS stavkalari – bu yerda.
3 – advokatlarning davlat idoralari, korхonalari va tashkilotlarida yuriskonsult boʻlib ishlashiga ruхsat berish. Ayni paytda cheklov amal qiladi: advokat ilmiy va pedagogik faoliyatdan, shuningdek Advokatlar palatasidagi va uning hududiy boshqarmalaridagi faoliyatdan tashqari haq toʻlanadigan boshqa turdagi faoliyat bilan shugʻullanishga haqli emas.
Tegishli qonun loyihasini ishlab chiqish 2018 yil 20 aprelga belgilangan. Ijrochilar – Adliya vazirligi, Moliya vazirligi, DSQ va Advokatlar palatasi.
Ushbu hujjat Qonun hujjatlari ma’lumotlari milliy bazasida rasman e’lon qilingan va 23.01.2018 yilda kuchga kirdi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Anvar Irkaхoʻjayev.
