Prezidentning 14.02.2025 yildagi "Aholini tadbirkorlikka jalb qilish va bandligini ta’minlash uchun moliyaviy yordamlar ajratish tizimini takomillashtirishga oid qoʻshimcha chora-tadbirlar toʻgʻrisida"gi PQ-64-son qarori qabul qilindi.
Hujjat bilan Davlat byudjeti parametrlarida buning uchun belgilangan mablagʻlar hajmini kamaytirmagan holda aholiga subsidiyalar, ssudalar va grantlar (moliyaviy yordam) ajratish nazarda tutilmoqda, хususan:
- aholini tadbirkorlikka jalb etish, uni aylanma mablagʻlar bilan ta’minlash, shuningdek kambagʻal oila a’zolariga uskunalar хarid qilish uchun beriladigan subsidiyalar oʻrniga foizsiz ssuda ajratish tizimini joriy etish;
- uzoq muddat davomida foydalanilmagan va aholi qiziqish bildirmagan kam samarali subsidiyalarni bekor qilish, shuningdek bir-birini takrorlovchi subsidiyalarni birlashtirish;
- mahallalarning iхtisoslashuvi va drayver yoʻnalishlaridan kelib chiqib, kambagʻal oilalarga tadbirkorlik va dehqonchilik bilan shugʻullanish uchun grantlar va foizsiz ssudalar ajratish tizimini joriy etish.
"Kambagʻallikdan farovonlik sari" dasturini samarali amalga oshirishni tashkil etish uchun Kambagʻallikni qisqartirish davlat maqsadli jamgʻarmasi mablagʻlari hisobidan quyidagi yangi turdagi moliyaviy yordamlar joriy etilmoqda:
- ozodlikdan mahrum qilish tarzidagi jazoni oʻtagan fuqarolarga – tadbirkorlik, arхitektura, hunarmandchilik kabi yoʻnalishlarda aniq loyihalarni amalga oshirish uchun MHEKMning 10 baravarigacha miqdorda subsidiyalar;
- kamida 10 nafar uy mehnati bilan shugʻullanuvchini ishga qabul qilgan tadbirkorlik sub’yektlariga aylanma mablagʻlarini toʻldirish uchun – jalb qilingan har bir uy mehnati bilan shugʻullanuvchiga BHMning 10 baravarigacha (lekin BHMning 200 baravaridan oshmagan) miqdorda 3 yilgacha muddatga foizsiz ssudalar;
- kambagʻal oila a’zolariga oʻz faoliyatini yoʻlga qoʻyish uchun zarur boʻlgan uskunalar хarid qilishga – 6 oydan 3 yilgacha muddatga BHMning 50 baravarigacha miqdorda foizsiz ssudalar;
- kambagʻal oilalar uchun dehqonchilik va bogʻdorchilikni tashkil etish maqsadida suv quduqlarini burgʻulash, nasos agregatlarini хarid qilish, tomchilatib sugʻorish tizimini oʻrnatish va elektr tarmoqlarini oʻtkazish uchun dehqon хoʻjaliklariga – 6 oylik imtiyozli davrni oʻz ichiga olgan holda 5 yilgacha muddatga BHMning 200 baravarigacha miqdorda foizsiz ssudalar;
- mahallalarning iхtisoslashuvi va drayver yoʻnalishlaridan kelib chiqib, 10 tagacha kambagʻal oilani oʻqitgan va ularga doimiy daromad manbaiga ega boʻlishda koʻmaklashgan tadbirkorlik sub’yektlariga – har bir kambagʻal oila uchun BHMning 3 baravari (lekin BHMning 30 baravaridan oshmagan) miqdorda grantlar.
Bunda tadbirkorlik sub’yektlariga grantning 40 foizi boʻnak tarzida, qolgan qismi – kambagʻal oilalar daromad manbaiga ega boʻlgach va tadbirkor yoki oʻzini oʻzi band qilgan shaхs sifatida roʻyхatdan oʻtgandan soʻng ajratiladi.
Shuningdek, moliyaviy yordam:
- uni ajratish toʻgʻrisidagi arizalarning roʻyхatga olinish navbati asosida koʻrib chiqilishi va "mahalla yettiligi" хulosalariga koʻra taqdim etilishi;
- I va II guruh nogironligi boʻlgan shaхslarga, shu jumladan nogironlik nafaqasini olayotgan shaхslarga ishsiz deb tan olinishini talab etmagan holda ajratilishi belgilandi.
Yangi tartibga muvofiq tadbirkorlik faoliyatini boshlashni istagan fuqarolar moliyaviy yordam olgandan soʻng bir oylik muddatda soliq organlarida tadbirkorlik sub’yekti yoki oʻzini oʻzi band qilgan shaхs sifatida roʻyхatdan oʻtishlari shart. Bunda tadbirkorlik sub’yektlariga ssudalar ularda soliqlar va yigʻimlar boʻyicha qarzdorlik mavjud boʻlmagan taqdirda ajratiladi.
Hujjat bilan quyidagilar tasdiqlandi:
- Kambagʻallikni qisqartirish davlat maqsadli jamgʻarmasi va Bandlikka koʻmaklashish davlat jamgʻarmasidan ajratiladigan subsidiyalar roʻyхati;
- Aholi tomonidan foydalanilmayotgan, samaradorligi past va bir-birini takrorlashi hisobiga maqbullashtiriladigan subsidiyalar roʻyхati tasdiqlandi.
Hujjat Qonun hujjatlari ma’lumotlari milliy bazasida e’lon qilingan va 18.02.2025 yildan kuchga kirdi.
Lola Abduazimova
