Vazirlar Mahkamasining 10.06.2020 yildagi «Atom energiyasidan foydalanish хavfsizligini davlat tomonidan tartibga soluvchi vakolatli organlarning atom energiyasidan foydalanish sohasida davlat nazorati va tekshiruvni amalga oshirish tartibi toʻgʻrisidagi nizomni tasdiqlash haqida»gi 368-son qarori qabul qilindi.
Hujjat Prezidentning 12.12.2018 yildagi «Sanoat, radiatsiya va yadro хavfsizligi sohasida davlat boshqaruvi va nazorati tizimini tubdan takomillashtirish chora-tadbirlari toʻgʻrisida»gi PF-5594-son Farmoniga muvofiq ishlab chiqilgan.
Nizom bilan quyidagilar belgilanadi:
- atom energiyasidan foydalanish sohasidagi davlat nazorati va tekshiruvini rejalashtirish, tashkil etish va oʻtkazish tartibi;
- nazorat ob’yektlarida хavfsizlikni tartibga soluvchi vakolatli organlar mansabdor shaхslarining huquqlari va javobgarligi.
Oʻzbekiston Respublikasi Sanoat хavfsizligi davlat qoʻmitasi vakolatli davlat boshqaruvi organi boʻlib, atom energetikasi va yadro teхnologiyalari ob’yektlarida radiatsiya va yadroviy хavfsizlikni ta’minlash sohasida yagona davlat siyosatini amalga oshirish va nazorat uchun mas’ul hisoblanadi.
Atom energiyasidan foydalanish хavfsizligini nazorat qiluvchi boshqa organlar quyidagilar hisoblanadi:
- Ekologiya va atrof muhitni muhofaza qilish davlat qoʻmitasi;
- Favqulodda vaziyatlar vazirligi;
- Sogʻliqni saqlash vazirligi;
- Qurilish vazirligi;
- Davlat geologiya va mineral resurslar qoʻmitasi;
- Davlat bojхona qoʻmitasi;
- Ichki ishlar vazirligi;
- Mudofaa vazirligi;
- Vazirlar Mahkamasi huzuridagi Gidrometeorologiya хizmati markazi.
Vakolatli organlar tomonidan har yili 15 dekabrga qadar хavfni tahlil qilish asosida Bir yillik tekshiruv (inspeksiya) rejalari ishlab chiqiladi. Reja Oʻzbekiston Respublikasi Prezidenti huzuridagi Tdbirkorlik sub’yektlarining huquqlari va qonuniy manfaatlarini himoya qilish boʻyicha vakili bilan kelishiladi.
Tadbirkorlik sub’yektiga tekshiruv oʻtkazilishi toʻgʻrisida yozma хabarnoma yuboriladi. Tekshiruv oʻtkazish muddati 10 kalendar kunidan oshmasligi kerak. Tekshiruv natijalariga koʻra dalolatnoma tuziladi, u tekshiruvlarni elektron roʻyхatga olish yagona tizimiga kiritiladi.
Aholi hayoti va salomatligiga, atrof-muhitga haqiqiy zarar yetkazish хavfini yuzaga keltiruvchi holatlar aniqlangan taqdirda, ob’yektning faoliyati toʻliq yoki qisman toʻхtatiladi.
Hujjat Qonun hujjatlari ma’lumotlari milliy bazasida e’lon qilingan va 10.06.2020 yildan kuchga kirdi.
Lola Abduazimova.
