Prezidentning 15.08.2017 yildagi PQ–3213-son «Oʻzbekiston Respublikasi tashqi iqtisodiy faoliyatini yanada tartibga solish chora-tadbirlari toʻgʻrisida»gi qarori e’lon qilindi. Bu haqda Tashqi savdo vazirligi saytida хabar qilinadi.
Hujjat bilan joriy yilning 1 sentyabridan olib kelinadigan qator tovarlar uchun import boji stavkalari, shuningdek aksiz soligʻining pasaytirilishi koʻzda tutilgan.
Ayrim tovar pozitsiyalari boʻyicha shu sanadan e’tiboran “nol” stavka qoʻllaniladi:
- import bojхona boji – sariyogʻ, yangi yoki sovutilgan urugʻlik kartoshka, javdar un, qattiq bugʻdoy va javdardan yirik tortilgan yorma va un, soya va kungaboqar yogʻi, rafinatsiyalash uchun shakarqamish, shuningdek ayrim don ekinlari va farmatsevtika mahsulotlari;
- aksiz soligʻi – goʻsht va goʻshtli oziq-ovqat submahsulotlar, bugʻdoy uni hamda hayvonlarni boqishda ishlatiladigan mahsulotlar.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
