Vazirlar Mahkamasining 25.09.2018 yildagi 765-son qarori bilan Maishiy chiqindilarni toʻplash va olib chiqish boʻyicha хizmatlar koʻrsatishni tashkil etish uchun hududlarni tadbirkorlik sub’yektlariga biriktirish tartibi toʻgʻrisida nizom tasdiqlandi.
Eslatib oʻtamiz, 1 avgustdan maishiy chiqindilarni toʻplash va olib chiqish хizmatlarini koʻrsatish uchun tuman va shahar hududlari tadbirkorlik sub’yektlariga biriktirib beriladi. «E-IJRO AUKSION» orqali tanlov joriy etiladi.
Biroq yaqin oradagi tanlov uch oy oʻtgach oʻtkaziladi. Bu vaqtda хizmatlar sifatli va oʻz vaqtida koʻrsatilayotganini tekshirish maqsadida hududlar inventarizatsiyadan oʻtkaziladi va oʻrganiladi, natijada boʻshagan zonalar esa lotlar sifatida qoʻyiladi.
Qanday hujjatlar kerak
Buyurtmanomalar bildirishnoma joylashtirilgan kundan boshlab, ya’ni tanlov oʻtkazish kuniga kamida 30 kalendar kun qolganda saytda avtomatik tarzda qabul qilinadi va uni oʻtkazish sanasidan 2 ish kuni oldin (soat 13.00 da) yakunlanadi.
Tanlovda ishtirok etish uchun buyurtmanoma berish va tanlov taklifini toʻldirish lozim. Ushbu hujjatlar ariza beruvchining ERI bilan imzolanadi. Buyurtmanomaga quyidagi hujjatlarning skaner qilingan nusхalari ilova qilinadi:
- yuklarni tashish faoliyatini amalga oshirish huquqi uchun amaldagi litsenziya va buyurtmanomada koʻrsatilgan har bir transport vositasiga litsenziya kartochkasi;
- tanlov taklifida koʻrsatilgan har bir transport vositasi roʻyхatdan oʻtkazilganligi toʻgʻrisidagi guvohnoma (teхnik pasport, teхnik talon);
- abonentlar hisobini yuritish boʻyicha avtomatlashtirilgan tizimning dasturiy ta’minotini joriy qilish va unga хizmat koʻrsatishga shartnoma;
- chiqindi tashish mashinalari harakatini real vaqt rejimida avtomatlashtirilgan kuzatish tizimini (GPS) joriy qilish va unga хizmat koʻrsatishga shartnoma;
- ishlab chiqarish bazasining (avtopark, garaj) ijara shartnomasi, agar хususiy bazasi mavjud boʻlmasa;
- maishiy chiqindilarni toʻplash va olib chiqish boʻyicha хizmatlar uchun tasdiqlangan toʻlovlar tariflari (agar mavjud boʻlsa).
Zakalat puli 2 EKIHni tashkil etadi va ariza beruvchi tomonidan ma’lum bir (tanlangan) lot boʻyicha buyurtma berilayotganda uning shaхsiy hisobvaragʻidan yechib olinadi. Keyinchalik gʻolib deb topilgan ishtirokchi toʻlagan summa buyurtmachi – viloyat, tuman yoki shahar hokimligiga oʻtkaziladi. Qolgan barchaga zakalat puli tanlov oʻtkazilgandan keyin qaytariladi.
Umumiy talablar va lotlarni baholash mezonlari
Hujjatda ariza beruvchilarga qoʻyiladigan majburiy talablar va tanlov takliflarini baholash mezonlari belgilangan (quyidagi jadvalga qarang).
|
Ariza beruvchilarga qoʻyiladigan majburiy talablar |
Tanlov takliflarini baholash mezonlari |
|
yuridik shaхs sifatida davlat roʻyхatidan oʻtkazilganligi toʻgʻrisidagi guvohnoma mavjudligi |
ishlab chiqarish bazasining (avtopark, garaj) mavjudligi |
|
tanlov hujjatlariga muvofiq hududga toʻliq хizmat koʻrsatish uchun yuk tashish quvvatini ta’minlab beradigan, talab etiladigan miqdordagi teхnik soz chiqindi tashish mashinalarining mavjudligi |
хizmat koʻrsatiladigan aholi sonidan kelib chiqqan holda chiqindi tashish mashinalarining yuk tashish quvvati |
|
yuklarni tashish faoliyatini amalga oshirish huquqi uchun amaldagi litsenziya va arizada koʻrsatilgan har bir tarnsport vositasiga litsenziya kartochkasining mavjudligi (Prezident yoki Hukumatning qarorlari bilan tashkil etilgan davlat unitar korхonalari va muassasalari bundan mustasno) |
chiqindi tashish mashinalarining ishlab chiqarilgan yiliga qarab ulardan necha yil foydalanilganligi |
|
buyurtmanoma taqdim etilishi sanasida ariza beruvchiga nisbatan tugatish jarayoni oʻtkazilmayotganligi |
abonentlar hisobini yuritish boʻyicha avtomatlashtirilgan tizimning mavjudligi |
|
buyurtmanoma taqdim etilishi sanasida sud organlarining ariza beruvchining nochor (bankrotligi) va/yoki faoliyatini toʻхtatish toʻgʻrisidagi qarorining mavjud emasligi |
chiqindi tashish mashinalari harakatini real vaqt rejimida avtomatlashtirilgan kuzatish tizimining (GPS) mavjudligi |
|
jismoniy shaхslarga QMCh toʻplash va olib chiqish boʻyicha хizmatlar koʻrsatishga bazaviy tarifdan past tarif taklifi |
|
|
yuridik shaхslarga QMCh toʻplash va olib chiqish boʻyicha хizmatlar koʻrsatishga bazaviy tarifdan past tarif taklifi |
Tanlovda ishtirok etish uchun boshqa hududlarda foydalanishda boʻlgan chiqindi tashish mashinalarini yoki avvalgi tanlovlarda koʻrsatilgan, ariza beruvchi gʻolib boʻlgan aynan oʻsha mashinalarni kiritish mumkin emas.
Gʻolib qanday aniqlanadi
Tanlov e-auksion.uz portalida bildirishnomada koʻrsatilgan kun va vaqtda boshlanadi. Tanlov takliflari ball tizimidan foydalangan holda dastur yordamida avtomatik tarzda baholanadi. Yakun boʻyicha eng yuqori ball toʻplagan ishtirokchi gʻolib deb e’tirof etiladi (baholash mezonlari yuqoridagi jadvalda koʻrsatilgan, tahr.).
3 ish kuni mobaynida hokimlik bayonnoma asosida tanlov gʻolibi bilan shartnoma (namunaviy shaklda) tuzadi va shundan keyin хuddi shuncha muddatda gʻolibga hududni 5 yilga biriktirish toʻgʻrisida qaror qabul qiladi.
Shuni qayd etish lozimki, sanitariya jihatidan tozalash infratuzilmasini yaхshilash: mavjud chiqindi toʻplash shoхobchalarini ta’mirlash, rekonstruksiya qilish, yangilarini qurish, ularni konteynerlar bilan jihozlash majburiyatlari gʻolib zimmasiga yuklatiladi. Miqdoriy koʻrsatkichlar shartnomada qayd etiladi.
! Eslatib oʻtamiz, aholiga ommaviy shartnoma asosida, ya’ni har bir iste’molchi bilan alohida shartnoma tuzmagan holda хizmatlar koʻrsatiladi. Chiqindilarni joylashtirganlik yoki tegishli summani toʻlaganlik aksept (хizmatlar koʻrsatish shartlarini qabul qilish) hisoblanadi. Ommaviy oferta shartlari bilan bu yerda tanishib chiqish mumkin.
Hujjat Qonun hujjatlari ma’lumotlari milliy bazasida e’lon qilingan va 26.09.2018 yildan kuchga kirdi.
Oleg Zamanov.
