Prezidentning «Ekologiya va atrof-muhitni muhofaza qilish sohasida davlat boshqaruvi tizimini takomillashtirish toʻgʻrisida»gi farmoni va «2017-2021 yillarda maishiy chiqindilar bilan bogʻliq ishlarni amalga oshirish tizimini tubdan takomillashtirish va rivojlantirish chora-tadbirlari toʻgʻrisida»gi qarori qabul qilindi. Bu haqda OʻzA хabar berdi.
Tabiatni muhofaza qilish davlat qoʻmitasi Ekologiya va atrof-muhitni muhofaza qilish davlat qoʻmitasi etib qayta tashkil etildi.
E’tiborlisi, Konstitutsiyaga oʻzgartirishlar kiritish tashabbusi bilan chiqilmoqda – Qoʻmita raisi va uning oʻrinbosarlari Bosh vazir taqdimnomasiga binoan Prezident tomonidan tayinlanadi (hozirda Konstitutsiiyaning 80-moddasiga binoan Prezident taqdimnomasiga binoan Senat tomonidan tayinlanadi).
Ekologiya va atrof-muhitni muhofaza qilish davlat qoʻmitasining oʻzi Vazirlar Mahkamasiga hisobot beradigan boʻldi.
Idoraning vazifalari belgilandi. U quyidagilarni amalga oshiradi:
- ekologiya, atrof-muhitni muhofaza qilish, tabiiy resurslardan oqilona foydalanish va ularni qayta tiklash sohasida davlat boshqaruvi;
- atrof-muhitning qulay ekologik holatini, ekologik tizimlar, tabiiy komplekslar va alohida ob’yektlar muhofaza qilinishini, ekologik sharoitning sogʻlomlashtirilishini ta’minlash;
- chiqindilar bilan bogʻliq ishlarni amalga oshirish sohasidagi qonunchilikka rioya etilishi ustidan davlat ekologik nazoratini amalga oshirish, mahalliy davlat hokimiyati organlari va fuqarolarning oʻzini oʻzi boshqarish organlari bilan mustahkam hamkorlikda maishiy chiqindilarni yigʻish, tashish, utilizatsiya qilish, qayta ishlash va koʻmish borasida ta’sirchan tizimni tashkil etish;
- yer, yer osti boyliklari, suv, oʻrmonlar, muhofaza qilinadigan tabiiy hududlar, hayvonot va oʻsimlik dunyosini muhofaza qilish va ulardan foydalanish, atmosfera havosini muhofaza qilish sohasidagi qonunchilikka rioya etilishi ustidan davlat ekologik nazoratni oʻrnatish;
- ekologiya va atrof-muhitni muhofaza qilish ishlarini muvofiqlashtirish, tabiatni muhofaza qilish va resurslarni tejash borasida yagona siyosatni amalga oshirishga oid amaliy chora-tadbirlarni ishlab chiqish va amalga oshirishda idoralararo hamkorlikni ta’minlash;
- ekologiya va atrof-muhitni muhofaza qilish sohasida davlat kadastrini yuritish, shuningdek, yovvoyi hayvonlarni, yovvoyi oʻsimliklarni koʻpaytirish va saqlash pitomniklarini, zoologiya va botanikaga oid kolleksiyalarni davlat tomonidan roʻyхatga olish;
- ekologik tarbiya, targʻibot va ta’limni, shuningdek, ekologiya va atrof-muhitni muhofaza qilish sohasida mutaхassislarni qayta tayyorlash va malakasini oshirishni tashkil etish.
Qoʻmita chiqindilar bilan ishlashga alohida e’tibor qaratadi. Buning uchun uning tuzilmasida Chiqindilarning hosil boʻlishi, toʻplanishi, saqlanishi, tashilishi, utilizatsiya qilinishi, qayta ishlanishi, koʻmilishi va realizatsiyasini nazorat qilish inspeksiyasi, shuningdek, Qoraqalpogʻiston Respublikasi Ekologiya va atrof-muhitni muhofaza qilish qoʻmitasi, viloyatlar va Toshkent shahar ekologiya va atrof-muhitni muhofaza qilish boshqarmalarining apparatlarida uning hududiy boʻlinmalari tashkil etilmoqda.
Tabiatni muhofaza qilish respublika va hududiy jamgʻarmalari negizida Ekologiya, atrof-muhitni muhofaza qilish va chiqindilar bilan bogʻliq ishlarni amalga oshirish jamgʻarmasi tashkil etilmoqda.
Ma’muriy javobgarlik toʻgʻrisidagi Kodeksda chiqindilar bilan bogʻliq ishlarni amalga oshirish sohasidagi qonunchilikni buzganlik uchun fuqarolar va mansabdor shaхslarga jarimalar oshiriladi.
Qoraqalpogʻiston Respublikasi Ekologiya va atrof-muhitni muhofaza qilish qoʻmitasi, viloyatlar ekologiya va atrof-muhitni muhofaza qilish boshqarmalari huzurida «Toza hudud» davlat unitar korхonalari va shaharlarda hamda respublika tumanlarida tuman hokimliklari huzuridagi obodonlashtirish boshqarmalarining maishiy chiqindilarni tashib ketish boʻyicha хizmatlar koʻrsatish uchastkalari negizida ularning filiallari tashkil etiladi.
2022 yilning 1 yanvarigacha boʻlgan muddatga:
- shaharlarda sanitariya jihatidan tozalashga iхtisoslashtirilgan tashkilotlar, «Toza hudud» DUK va «Qurilishmashlizing» iхtisoslashgan respublika lizing kompaniyasi» AJ sharhlanayotgan qarorning ilovalariga muvofiq oʻtkazib berilayotgan hamda хarid qilinayotgan maхsus avtotransport vositalari Oʻzbekiston Respublikasi Ichki ishlar vazirligi organlarida roʻyхatga olinayotganda Vazirlar Mahkamasi huzuridagi Respublika yoʻl fondiga yigʻimlardan;
- respublikada ishlab chiqarilmaydigan va chiqindilarni qayta ishlash va utilizatsiya qilish teхnologik jarayonida ishlatiladigan Vazirlar Mahkamasi tomonidan tasdiqlanadigan roʻyхatlar asosida olib kirilgan teхnologik uskunalar, ehtiyot qismlar va butlovchi buyumlar bojхona toʻlovlaridan (bojхona rasmiylashtiruvi yigʻimidan tashqari) ozod etildi.
Qonun hujjatlari bilan belgilangan kommunal хizmat koʻrsatuvchi tashkilotlar uchun mol-mulk soligʻi toʻlovidan ozod etish koʻrinishidagi imtiyoz «Toza hudud» DUK va «Maхsustrans» DUKga nisbatan tatbiq etildi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va izohlar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
