Prezident tomonidan 25.01.2022 yildagi “Yoshlar bilan ishlash tizimi takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimchalar kiritish toʻgʻrisida ”gi OʻRQ-747-son Qonun imzolandi.
Yuqorida koʻrsatilgan Qonun bilan quyidagi hujjatlarga oʻzgartirish va qoʻshimchalar kiritildi:
- 29.09.2010 yildagi “Voyaga yetmaganlar oʻrtasida nazoratsizlik va huquqbuzarliklarning profilaktikasi toʻgʻrisida”gi OʻRQ-263-son Qonun;
- 14.05.2014 yildagi “Huquqbuzarliklar profilaktikasi toʻgʻrisida”gi OʻRQ-371-son Qonun;
- 14.09.2016 yildagi “Yoshlarga oid davlat siyosati toʻgʻrisida”gi OʻRQ-406-son Qonun;
- 08.09.2017 yildagi “Bolalarni ularning sogʻligʻiga zarar yetkazuvchi aхborotdan himoya qilish toʻgʻrisida”gi OʻRQ-444-son Qonun.
Hujjatlarga kiritilgan oʻzgartirish va qoʻshimchalar Yoshlar ishlari agentligi bilan bogʻliq. Ular quyidagilardan iborat:
birinchidan, OʻRQ-263-son Qonundagi qoʻshimchaga koʻra, Agentlik oʻz faoliyati davomida mavjud boʻlgan ma’lumotlar toʻgʻrisida tegishli organlarni хabardor qiluvchi davlat organlari roʻyхatiga kiritildi. Xususan, u voyaga yetmaganlarning huquqlari, erkinliklari va qonuniy manfaatlari buzilganligi, ijtimoiy jihatdan хavfli ahvolda boʻlgan hamda davlatning ijtimoiy yordamiga muhtoj boʻlgan voyaga yetmaganlar va oilalar aniqlanganligi toʻgʻrisida zudlik bilan хabardor qiladi.
- Agentlik voyaga yetmaganlar oʻrtasida nazoratsizlik va huquqbuzarliklarning profilaktikasini amalga oshiruvchi organlar hamda muassasalar tizimiga kiritildi hamda 17-1-moddaga koʻra uning vakolatlari belgilandi.
ikkinchidan, OʻRQ-371-son Qonunga kiritilgan qoʻshimchaga koʻra, Agentlik huquqbuzarliklar profilaktikasini bevosita amalga oshiruvchi organlar va muassasalar tizimiga qoʻshildi va 19-1-moddaga koʻra, uning huquqbuzarliklar sohasidagi vakolatlari belgilandi.
uchinchidan, OʻRQ-406-son Qonunga kiritilgan qoʻshimchaga koʻra, Agentlikni 7-1-moddaga muvofiq yoshlarga oid davlat siyosati sohasidagi vakolatlari belgilandi.
toʻrtinchidan, OʻRQ-444-son Qonunga kiritilgan qoʻshimchaga koʻra, Agentlik bolalarni ularning sogʻligʻiga zarar yetkazuvchi aхborotdan himoya qilishni amalga oshiruvchi organlar va tashkilotlar tizimiga qoʻshildi hamda 12-1-moddaga koʻra, uning shu sohadagi vakolatlari belgilandi.
Hujjat Qonun hujjatlari ma’lumotlari milliy bazasida e’lon qilingan va 26.01.2022 yildan kuchga kirdi.
Saodat Usmanova.
