Adliya vazirligi “25 soʻmlik va undan kichik nominal qiymatdagi tangalar va banknotlarni muomaladan qaytarib olish tartibi toʻgʻrisidagi nizomni tasdiqlash haqida”gi qarorni roʻyхatdan oʻtkazdi (roʻyхat raqami 3183, 18.09.2019 yil).
2020 yil 1 martdan boshlab:
- 1, 3, 5, 10, 20, 50 tiyinlik, 1, 5, 10, 25 soʻmlik qiymatidagi tangalar;
- 1, 3, 5, 10, 25 soʻmlik eski namunadagi banknotlar qonuniy toʻlov vositasi sifatida oʻz kuchini yoʻqotadi.
Ushbu tanga va banknotlar hech qanday monelik, cheklovlarsiz, toʻlov yoki vositachilik haqi undirilmagan holda:
- 2020 yil 1 martga qadar hisob-kitob kassa markazlari, tijorat banklari va ularning filiallari tomonidan;
- 2020 yil 1 martdan 2021 yil 1 yanvarga qadar esa faqat hisob-kitob kassa markazlari tomonidan almashtirib beriladi.
Bunda hisob-kitoblar mijozlar va aholining talabiga asosan:
- bank plastik kartasi hisobvaraqlariga kirim qilinish orqali (toʻliq qiymatda);
- muomaladagi tanga va banknotlarga ayirboshlab berish orqali;
- mijozlarning tegishli hisobvaraqlariga, fuqarolarning arizasiga asosan omonatga kirim qilish orqali;
- kommunal va boshqa bir martalik toʻlovlar uchun qabul qilish orqali amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 18.09.2019 yildan kuchga kirdi.
