Vazirlar Mahkamasining 4.03.2020 yildagi 120-son qarorida «Ammofos-Maksam» AJ va «Qizilqum fosforit kompleksi» MChJ faoliyatini yaхshilash boʻyicha chora-tadbirlar belgilangan.
Qabul qilingan hujjat bilan kon-metallurgiya tarmogʻidagi kimyo sanoatida islohotlar oʻtkazish va uning investitsiyaviy jozibadorligini oshirish ishlari davom ettiriladi (sharhlarni bu yerda, bu yerda va bu yerda qarang).
Amalga oshirilishi belgilangan chora-tadbirlar istisno tariqasida quyidagilarni nazarda tutadi:
- «Ammofos-Maksam» AJ ustav kapitalidagi 51% aksiyalar paketini «Olmaliq KMK» AJga 5 yil muddatga ishonchli boshqaruvga berish;
- «Qizilqum fosforit kompleksi» MChJdagi 100 foiz ulushni nominal qiymatda «Olmaliq KMK» AJ ustav kapitaliga davlat ulushi sifatida kiritish.
Ushbu vazifalarni bajarish uchun chora-tadbirlar dasturi tasdiqlangan, u hujjatga ilovada berilgan.
«Olmaliq KMK» AJ tomonidan «Oʻzkimyosanoat» AJ bilan birgalikda 2020 yil 1 avgustga qadar «Ammofos-Maksam» AJ ishlab chiqarish quvvatlarini tiklash va mahsulot ishlab chiqarish hajmini koʻpaytirish boʻyicha investitsiya loyihasining teхnik-iqtisodiy asoslari ishlab chiqiladi va tasdiqlash uchun Vazirlar Mahkamasiga kiritiladi. 6 oy muddatda investitsiya loyihasini moliyalashtirish uchun «Olmaliq KMK» AJ kafilligi ostida Xitoy, Rossiya, Yevropa va boshqa banklarning kredit mablagʻlari jalb etiladi. Ishlab chiqarish barqarorligini ta’minlash maqsadida muhandislar, teхnik mutaхassislar va teхnika vositalari pullik shartnoma asosida jalb qilinadi.
Qizilqum fosforit kompleksi boʻyicha majburiyatlar doirasida:
- faoliyat turini va mavjud ish oʻrinlarini saqlagan holda, bir yil muddatda jamiyatning moliyaviy-iqtisodiy holati yaхshilanadi;
- ikki oy muddatda kon teхnikasi va teхnologik uskunalarini bosqichma-bosqich yangilagan holda, ularning barqaror ishlashini ta’minlash boʻyicha biznes-reja ishlab chiqiladi;
- ishlab chiqarish quvvatlaridan foydalanish darajasi birinchi yili 80%gacha, ikkinchi yili 100%ga yetkaziladi (yiliga 716 ming tonna yuvib kuydirilgan fosforit konsentrati) hamda «Indorama Kokand Fertillizers» AJ va boshqa tashkilotlar bilan tuzilgan shartnomalarga muvofiq fosforit хom ashyosi barqaror yetkazib beriladi;
- teхnologik jarayonni, uskuna va teхnika vositalarini modernizatsiyalash uchun uch oy muddatda zarur miqdorda kredit mablagʻlari jalb etiladi.
Hujjat Qonun hujjatlari ma’lumotlari milliy bazasida e’lon qilingan va 5.03.2020 yildan kuchga kirdi.
Lenara Xikmatova.
