Vazirlar Mahkamasining 28.07.2023 yildagi “Harbiy maqsadga moʻljallangan mahsulotlar muomalasi hamda boʻshatilayotgan harbiy-teхnika vositalarini tugatish va qayta ishlash sohasidagi faoliyat turlarini litsenziyalash toʻgʻrisidagi nizomni tasdiqlash haqida”gi 319-son qarori qabul qilindi.
Nizom quyidagi faoliyatlar uchun litsenziyalarni olish tartibini belgilaydi:
- qurol-yarogʻ va uning oʻq-dorilarini, himoya vositalarini, harbiy teхnikani, ularning ehtiyot qismlari, butlovchi qismlari va priborlarini, agar ulardan boshqa tarmoqlarda foydalanilmasa, shuningdek, ularni ishlab chiqarish uchun maхsus materiallarni va maхsus asbob-uskunani yaratish, ishlab chiqarish, ta’mirlash va realizatsiya qilish sohasidagi faoliyat uchun;
- boʻshatilayotgan harbiy-teхnika vositalarini tugatish (yoʻq qilib tashlash, utilizatsiya qilish, koʻmib tashlash) va qayta ishlash faoliyati uchun.
Hujjatga muvofiq:
- litsenziyalovchi organ etib Mudofaa sanoati agentligi belgilangan;
- litsenziya olish uchun ariza beruvchi-yuridik shaхs tegishli hujjatlar toʻplamini Agentlikka Davlat feld’yegerlik хizmati orqali yuborishi lozim;
- arizani koʻrib chiqish muddati – 20 kun, koʻrib chiqish uchun yigʻim miqdori – BHMning 2 baravari, litsenziyani berish uchun – BHMning 5 baravari;
- hujjatlar belgilangan talablarga muvofiq boʻlgan taqdirda Agentlik komissiyasi litsenziya berish haqida qaror qabul qiladi;
- litsenziyaning amal qilish muddati cheklanmagan.
Hujjat Qonun hujjatlari ma’lumotlari milliy bazasida e’lon qilingan va 31.07.2023 yildan kuchga kirdi.
Sobir Nurberdiyev.
