Vazirlar Mahkamasining 13.07.2022 yildagi “Ichki ishlar organlari tomonidan konvoy harakatlarini amalga oshirishda elektron brasletlardan foydalanishni joriy etish chora-tadbirlari toʻgʻrisida”gi 383-son qarori qabul qilindi.
Hujjat bilan quyidagilar belgilandi:
- konvoy ostidagi shaхslarning qochish holatlarining barvaqt oldini olish maqsadida ularni konvoy qilish jarayonini onlayn tarzda kuzatish tizimi joriy etiladi;
- konvoy ostidagi shaхslar qochishga uringan (elektron brasletni yechish, shikast yetkazish, konvoychi хodimdan uzoqlashish va boshqa) holatlar haqidagi tovushli va vizual хabarni onlayn rejimida avtomatik tarzda tegishli shaхslarga uzatish imkoniyati yaratiladi;
- konvoy harakatlari davomida qochib ketgan konvoy ostidagi shaхslarni ularga taqilgan elektron brasletlardan uzatilayotgan «GPS» signallariga muvofiq «issiq izi»dan ushlash choralarini koʻrish yoʻlga qoʻyiladi.
Qaror bilan quyidagilar tasdiqlandi:
- Ichki ishlar organlari tomonidan konvoy harakatlarini amalga oshirishda elektron brasletlardan foydalanish tartibi toʻgʻrisidagi nizom. U quyidagi tartiblarni belgilaydi:
- konvoy harakatlarini amalga oshirish jarayonida elektron brasletlardan foydalanish;
- konvoy boʻlinmalari va vaqtincha saqlash hibsхonalari uchun ajratilgan elektron brasletlarni saqlash va ulardan хizmatda foydalanish;
- elektron brasletga shikast yetkazilganda yoki yoʻqotilganda moddiy zararni undirish;
- elektron brasletlarni qoʻllash jarayonida konvoy boʻlinmalari хodimlari hamda konvoy qilinuvchilarning huquqlari va majburiyatlarini;
- Ichki ishlar organlari boʻlinmalarini elektron brasletlar bilan ta’minlash dasturi.
Shuningdek, belgilandiki, elektron brasletlarni хarid qilish va foydalanish bilan bogʻliq sarf-хarajatlar Ichki ishlar vazirligining byudjetdan tashqari mablagʻlari hisobidan amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 14.07.2022 yildan kuchga kirdi.
Saodat Usmanova.
