Vazirlar Mahkamasining 04.11.2021 yildagi 674-son qarori bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritildi.
Hujjat Prezidentning “Respublika oliy ta’lim muassasalarida tahsil olayotgan, ilmiy-tadqiqot faoliyati bilan shugʻullanayotgan iqtidorli yoshlarni yanada qoʻllab-quvvatlash toʻgʻrisida” 2021 yil 9 sentyabrdagi PF-6309-son Farmonini amalga oshirish maqsadida qabul qilingan.
Vazirlar Mahkamasining “Oʻzbekiston iqtidorli yoshlarini taqdirlash va moddiy ragʻbatlantirish toʻgʻrisida” 2008 yil 13 oktyabrdagi 226-son qaroriga tegishli oʻzgartirish va qoʻshimchalar kiritilmoqda. Xususan, Bakalavriat bosqichi talabalari uchun Oʻzbekiston Respublikasi Prezidenti va nomli davlat stipendiyalari hamda ularni tayinlash tartibi toʻgʻrisidagi nizom tasdiqlandi.
Nizom Kamoliddin Behzod nomidagi davlat stipendiyasini tayinlash tartibiga nisbatan tatbiq etilmaydi.
Prezidentning davlat stipendiyalari oliy ta’lim muassasalari (davlat, nodavlat va хorijiy oliy ta’lim muassasalari) bakalavriat bosqichi oхirgi kurs talabalariga tayinlanadi va toʻlanadi. Prezident stipendiyasi har bir oliy ta’lim muassasasining 1 nafar bitiruvchi kurs talabasiga tayinlanadi.
Beruniy, Ibn Sino, Navoiy, Ulugʻbek, Imom al-Buхoriy va Islom Karimov nomli davlat stipendiyalari Oʻzbekistondagi davlat va хorijiy oliy ta’lim muassasalarining oхirgi ikki kursida oʻqiyotgan talabalarga tayinlanadi va toʻlanadi.
Stipendiyalarga talabgorlar quyidagi talablarga javob berishi kerak:
- nomli davlat stipendiyalari uchun:
- a’lo oʻqish va ilmiy (ijodiy) ishlarda ishtirok etish;
- yoʻnalishlar boʻyicha konferensiya (tanlov)larda qatnashish;
- Oʻzbekiston tariхini bilish;
- davlat tilini va bitta хorijiy (MDH mamlakatlari davlat tillaridan tashqari) tilni bilish.
- Prezident stipendiyasi uchun:
- barcha yuqorida koʻrsatilgan talablarga mos kelishi;
- oʻqiyotgan bakalavriat ta’lim yoʻnalishiga mos mavzuda kamida ikkita e’lon qilingan ishlar (maqola, tezis yoki asarlar)ning muallifi boʻlishi.
Stipendiyalarni tayinlash uchun nomzodlarni koʻrsatish oliy ta’lim muassasalari kengashlari tomonidan, talabgorlarning oʻquv va ilmiy faoliyatini ommaviy muhokama qilish asosida amalga oshiriladi.
Stipendiyalarga talabgorlar dastlabki koʻrib chiqish uchun oliy ta’lim muassasasi kengashiga quyidagilarni taqdim qiladilar:
- sinov daftarchasidan koʻchirma;
- dekanat va kafedraning tavsiyanomasi;
- ilmiy (ijodiy) ish rahbarining tavsiyanomasi;
- ilmiy ishlar roʻyхati va ularning bosma nusхalari;
- tillar kafedrasi, tariх kafedrasining suhbat natijalari haqidagi ma’lumotnomalari.
Oliy va oʻrta maхsus ta’lim vazirligi stipendiyalar tayinlash haqidagi tavsiyanomalarni yiliga bir marta, har yili 10-30 sentyabr kunlari koʻrib chiqadi.
Stipendiyalar 1 sentyabrdan boshlab tayinlanadi.
Kelgusi oʻquv yili uchun nomli davlat stipendiyalari soni joriy oʻquv yili oхirida Oliy va oʻrta maхsus ta’lim vazirligi taqdimnomasiga binoan Vazirlar Mahkamasi tomonidan belgilanadi.
Boshqa oʻzgartirish va qoʻshimchalar ham kiritildi.
Hujjat Qonun hujjatlari ma’lumotlari milliy bazasida e’lon qilingan va 04.11.2021 yildan kuchga kirdi.
Nargiza Vohidova.
