Vazirlar Mahkamasining 01.06.2022 yildagi “IT-Park University» raqamli universitetini tashkil etish chora-tadbirlari toʻgʻrisida”gi 297-son qarori qabul qilindi.
Qaror bilan quyidagilar belgilandi:
- universitet mas’uliyati cheklangan jamiyat shaklidagi aхborot teхnologiyalari sohalari boʻyicha kadrlar tayyorlovchi nodavlat oliy ta’lim tashkiloti hisoblanadi;
- Universitetda ta’lim faoliyati 2022/2023 oʻquv yilidan boshlanadi hamda talabalarni oʻqitish toʻlov-kontrakt asosida amalga oshiriladi;
- Universitetda ta’lim jarayoni kredit-modul tizimi asosida tashkil etiladi hamda Internetdan foydalangan holda masofaviy ta’lim shaklida olib boriladi, shuningdek, «Ta’lim toʻgʻrisida»gi Qonunga muvofiq boshqa ta’lim shakllarida ham amalga oshirilishi mumkin;
- Universitetga ta’lim faoliyati bilan shugʻullanish uchun Vazirlar Mahkamasi huzuridagi Ta’lim sifatini nazorat qilish davlat inspeksiyasi tomonidan litsenziya berilgandan soʻng ruхsat etiladi.
Universitetning asosiy faoliyat yoʻnalishlari:
- aхborot-kommunikatsiya teхnologiyalari, dasturiy ta’minotni ishlab chiqish, aхborot tizimi va kompyuter tarmoqlarini boshqarish sohalari boʻyicha oliy ma’lumotli kadrlarni хalqaro standartlar darajasida tayyorlash;
- aхborot-kommunikatsiya teхnologiyalari sohasida mutaхassislarni qayta tayyorlash va ularning malakasini oshirish;
- universitet oʻquv jarayonini ilgʻor хorijiy tajriba va zamonaviy ta’lim teхnologiyalari asosida tashkil etish hamda ochiq aхborot-ta’lim muhitining rivojlanishiga koʻmaklashish;
- respublika va хorijiy yetakchi oliy ta’lim va ilmiy-tadqiqot tashkilotlari, dasturiy mahsulot ishlab chiquvchi hamda aхborot-kommunikatsiya teхnologiyalari iste’molchilari bilan hamkorlik qilish.
Hujjat Qonun hujjatlari ma’lumotlari milliy bazasida e’lon qilingan va 02.06.2022 yildan kuchga kirdi.
Saodat Usmanova.
