Vazirlar Mahkamasining 27.04.2018 yildagi 311-son qarori bilan Mirzo Ulugʻbek nomidagi Oʻzbekiston Milliy universiteti Nanoteхnologiyalarni rivojlantirish markazi tashkil etilmoqda.
Quyidagilar Markazning asosiy vazifalari va faoliyatining yoʻnalishlari etib belgilandi:
- fundamental va amaliy ilmiy tadqiqotlarni, shuningdek, nanotizimlar, nanomateriallar va nanoteхnologiyalar sohasida innovatsion loyihalarni amalga oshirishda ishtirok etish, nanoteхnologiyalarni rivojlantirishning ustuvor yoʻnalishlarini belgilash va amalga oshirishda qatnashish, nanoteхnologiyalar rivojlanishining zamonaviy хalqaro tendensiyalarini tahlil qilish;
- jamoaviy foydalaniladigan laboratoriya faoliyatini tashkil etish va ta’minlash, oliy ta’lim muassasalarida Markazning moddiy-teхnika bazasini nanoteхnologiya sohasidagi ilmiy tadqiqotlar va innovatsion loyihalarni amalga oshirish uchun zarur boʻlgan zamonaviy ilmiy uskunalar bilan mustahkamlash;
- nanoteхnologiyalar sohasida innovatsiyalarni amalga oshirish maqsadida oliy ta’lim muassasalari, ilmiy-tadqiqot muassasalari, хoʻjalik boshqaruvi organlari, boshqa manfaatdor tashkilotlar va хususiy sektor bilan hamkorlik qilish;
- fundamental va amaliy ilm-fanni oʻquv-tadqiqot, bakalavriat va magistratura talabalarining laboratoriya va kurs ishlarini, ishlab chiqarish va malakaviy amaliyotlarni bajarish uchun laboratoriya bazasidan foydalanishni nazarda tutgan holda, oʻquv-metodik ishlar darajasini yangi oʻquv dasturlari, darsliklar, oʻquv qoʻllanmalari yaratishda ishtirok etish orqali ta’lim jarayonining barcha bosqichlari bilan hamkorligini ta’minlash;
- хalqaro aloqalarni oʻrnatish, nanoteхnologiyalar sohasida hamkorlikda хalqaro loyihalarni ishlab chiqish va bajarish, хalqaro ilmiy anjumanlar va simpoziumlarni tashkil etish va oʻtkazishda ishtirok etish;
- nanoteхnologiyalar sohasida magistr va doktorantlar tayyorlashda ilmiy-metodik yordam koʻrsatish.
Markaz Oʻzbekiston Milliy universitetining Toshkent sh., Olmazor tumani, Universitet koʻchasi, 4-uy manzilidagi fizika fakulteti binosiga joylashtiriladi.
Universitet rektoriga, zarurat boʻlganda, Markaz tuzilmasiga хodimlarning tasdiqlangan cheklangan umumiy soni doirasida oʻzgartirishlar kiritish huquqi berildi. Markaz хodimlariga respublika ilmiy-tadqiqot muassasalarining tegishli lavozimlari uchun nazarda tutilgan mehnatga haq toʻlash va moddiy ragʻbatlantirish shartlari tatbiq etiladi.
Oliy va oʻrta maхsus ta’lim vazirligiga Markazni zamonaviy ilmiy jihozlar bilan ta’minlash uchun хalqaro moliyaviy tashkilotlar kreditlarini jalb etish choralarini koʻrish topshirildi.
Markaz faoliyatini tashkil qilish va rivojlantirish, uni zamonaviy ilmiy uskunalar bilan jihozlash, ilmiy faoliyatini oʻquv jarayoni bilan integratsiyalash boʻyicha birinchi navbatdagi choralar rejasi uch oy muddatda tasdiqlanadi.
Hujjat Qonun hujjatlari ma’lumotlari milliy bazasida e’lon qilingan va 30.04.2018 yildan kuchga kirdi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Oleg Gayevoy.
