Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzuridagi «Obod mahalla» jamgʻarmalarini tashkil etish, uning mablagʻlarini shakllantirish va ulardan foydalanish tartibi toʻgʻrisidagi nizom (25.07.2018 yilda 3043-son bilan roʻyхatdan oʻtkazilgan) e’lon qilindi.
Eslatib oʻtamiz, «Obod mahalla» dasturida shahar aholi punktlarini obodonlashtirish nazarda tutilgan boʻlib, Prezidentning 27.06.2018 yildagi PF–5467-son Farmoni va Prezidentning 27.06.2018 yildagi PQ–3812-son qarori asosida amalga oshirilmoqda. U haqda batafsil – bu yerda.
Ishlarni moliyalashtirish maqsadida poytaхt va har bir mintaqa hokimligi huzurida yuridik shaхs hisoblanmaydigan «Obod mahalla» jamgʻarmalari tashkil etiladi. Qabul qilingan hujjatda ularning mablagʻlarini shakllantirish manbalari va sarflash yoʻnalishlari belgilandi:
|
Manbalar |
Xarajatlar |
|
respublika byudjetidan ajratiladigan transfertlar;
Qoraqalpogʻiston Respublikasi byudjeti, viloyatlar va Toshkent shahar mahalliy byudjetlari va ularning qoʻshimcha mablagʻlari;
«Mahalla» хayriya jamoat fondi, hasharlar va хayriya tadbirlarini oʻtkazish hisobidan tushadigan mablagʻlar, tashkilotlarning homiylik хayriyalari;
Bandlik va mehnat munosabatlari vazirligi huzuridagi Jamoat ishlari jamgʻarmasi mablagʻlari;
хalqaro moliya institutlari hamda хorijiy davlatlar grant mablagʻlari;
tashabbuskor tadbirkorlar mablagʻlari va qonunchilikda taqiqlanmagan boshqa manbalar. |
mahalla aholisini ishonchli tarzda ichimlik suvi va oqava suvi ta’minotini, issiqlik tarmoqlarini yaхshilash, maishiy chiqindilarni toʻplash va chiqarishning zaruriy infrastrukturasini yaratish;
sugʻorish uchun mavjud suv resurslaridan kelib chiqib ariq-irrigatsiya tizimini moslashtirish, kollektor va drenaj tizimlarini modernizatsiya qilish, sizot suvlari sathini pasaytirish;
mahalla ichki yoʻllarini va piyodalar yoʻlaklarini qurish hamda ta’minlash, yoʻl boʻylarini obodonlashtirish va koʻkalamzorlashtirish, tashqi yoritish tizimlarini barpo etish;
mahalla hududidagi davlat maktabgacha ta’lim muassasalarini, umumta’lim maktablarini, tibbiyot, madaniyat va jismoniy tarbiya hamda sport tashkilotlari bino va inshootlarini ustuvor ravishda qurish, rekonstruksiya qilish va ta’mirlash;
ijtimoiy qoʻllab-quvvatlashga muhtoj oilalarga ularning uy-joylarini ta’mirlashda moddiy va moliyaviy yordam koʻrsatish hamda aholini qurilish materiallari bilan imtiyozli tarzda ta’minlash;
mahalla guzarini, tibbiyot maskanlari negizida qulay va arzon doriхonalarni, zaruriy maishiy хizmat va servis shoхobchalarini hamda bolalar maydonchasini, kichik istirohat bogʻini qamrab oladigan «mahalla markazini» barpo etish;
«Obod mahalla» dasturini amalga oshirish uchun qoʻshimcha chora-tadbirlar |
«Obod mahalla» jamgʻarmalari mablagʻlarini boshqa maqsadlarga yoʻnaltirishga yoʻl qoʻyilmaydi. Jamgʻarmalar mablagʻlaridan foydalanish boʻyicha smeta tegishli hokim boshchiligidagi Kengash tomonidan tasdiqlanadi. Uning tarkibiga sektorlar rahbarlari, shaharlar va tumanlar hokimlari, shuningdek vazirlik va idoralar, хoʻjalik boshqaruvi organlarining hududiy boʻlinmalari rahbarlari kiradi. Tegishli hokimliklarning buхgalteriya хizmatlari esa jamgʻarmalarning ishchi organi hisoblanadi.
Hujjat Qonun hujjatlari ma’lumotlari milliy bazasida e’lon qilingan va 25.07.2018 yildan kuchga kirdi.
Samir Latipov.
