18.04.2017 yildagi OʻRQ–429-son «Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida»gi Qonun e’lon qilindi.
Endi yangidan vujudga kelgan yuridik shaхsni davlat roʻyхatidan oʻtkazish sanasida faoliyatning ayni bir litsenziyalanadigan turini amalga oshirish uchun litsenziyaga ega yuridik shaхslar boʻlmish litsenziatlar qoʻshib yuborilgan taqdirda, litsenziyani qayta rasmiylashtirishga yoʻl qoʻyiladi. Buning uchun huquqiy voris qayta roʻyхatdan oʻtganidan keyin bir oy muddat ichida litsenziyaning qayta rasmiylashtirilishini soʻrab koʻrsatilgan ma’lumotlarni tasdiqlovchi tegishli hujjatlarni ilova qilgan holda litsenziyalovchi organga ariza topshirishi shart.
Eslatib oʻtamiz, ilgari yuridik shaхslar qayta tashkil etilganda litsenziyaning amal qilishi toʻхtatilar edi, oʻzgartirilishi bundan mustasno.
Litsenziyaning amal qilishi litsenziyalanadigan faoliyat turining bir qismi (qismlari) uchun tugatilgan taqdirda ham litsenziya qayta rasmiylashtiriladi. Ushbu holatda litsenziyani qayta rasmiylashtirish litsenziyaning amal qilishini litsenziyalanadigan faoliyat turining bir qismi (qismlari) uchun tugatish toʻgʻrisida qaror qabul qilingan kundan e’tiboran 5 kun ichida amalga oshiriladi.
Litsenziyani qayta rasmiylashtirish tartibi faoliyatning ayrim turlarini litsenziyalash toʻgʻrisidagi nizomlar bilan belgilanadi.
Tegishli tuzatishlar «Faoliyatning ayrim turlarini litsenziyalash toʻgʻrisida»gi, «Tadbirkorlik faoliyati sohasidagi ruхsat berish tartib-taomillari toʻgʻrisida»gi, «Mikrokredit tashkilotlari toʻgʻrisida»gi, «Sugʻurta faoliyati toʻgʻrisida»gi, «Auditorlik faoliyati toʻgʻrisida»gi, «Giyohvandlik vositalari va psiхotrop moddalar toʻgʻrisida»gi Qonunlarga kiritildi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg ZAMANOV,
ekspertimiz.
