Vazirlar Mahkamasining 19.07.2018 yildagi «Samarqand viloyatida kichik sanoat zonalarini kengaytirish chora-tadbirlari toʻgʻrisida»gi 556-son qarori e’lon qilindi.
Shuni qayd etamizki, Prezidentning 16.03.2018 yildagi PQ–3607-son qarori bilan Samarqand viloyatida 14 ta kichik sanoat zonalari tashkil etilgan. Ularning ishtirokchilari 1.02.2020 yilgacha yer soligʻining uch baravaridan kam boʻlmagan miqdorda yagona soliq toʻlovini toʻlash majburiyatidan ozod qilingan. Mazkur KSZ hududidagi investitsiya loyihalarini birgalikda moliyalashtirish uchun esa Oʻzbekiston Respublikasi Tiklanish va taraqqiyot jamgʻarmasining 50 mln AQSh dollari miqdoridagi kredit liniyasi ochilgan.
Endi ushbu KSZlarning uchtasiga (Samarqand shahar, Narpay va Oqdaryo tuman) umumiy maydoni 62,5 gektardan iborat qoʻshimcha hududlar qoʻshildi. U yerda zarur infratuzilma: elektr uzatish tarmoqlari, kirish yoʻllari, gaz oʻtkazish tarmoqlari, lokal tozalash inshootlari, suv toʻsish inshootlari, suv quvurlari va kanalizatsiya tarmoqlarini tashkil etish uchun esa Davlat byudjeti mablagʻlaridan 8 mlrd 625 mln soʻm ajratildi.
Hujjat Qonun hujjatlari ma’lumotlari milliy bazasida e’lon qilingan va 20.07.2018 yildan kuchga kirdi.
Samir Latipov.
