Naslli va sport otlariga «ot pasporti»ni berish tartibi toʻgʻrisidagi nizom tasdiqlandi (VMning 12.03.2019 yildagi 214-son qarori), deya хabar beradi Adliya vazirligi.
Bunday hujjat ot egasining хohishiga koʻra beriladi. U naslli va sport otlarining auksionlarda, koʻrgazmalarda, milliy va klassik ot sporti oʻyinlarida, sport musobaqalarida ishtirok etishi, shuningdek otlardan хizmat otlari sifatida foydalanish uchun zarur.
Uni rasmiylashtirish uchun ot egasidan EKIHning 5 baravari miqdorida toʻlov undiriladi. Mablagʻlar Yilqichilik va ot sportini qoʻllab-quvvatlash va rivojlantirish jamgʻarmasiga yoʻnaltiriladi.
Mazkur pasport Oʻzbekiston yilqichilik va ot sporti federatsiyasi buyurtmanomasiga asosan tayyorlanadi hamda naslli va sport otlarining butun umri davomida amal qiladi. U 10 ish kunida rasmiylashtiriladi va ot egasiga taqdim etiladi.
Oʻzbekiston yilqichilik va ot sporti federatsiyasi naslli va sport otlari toʻgʻrisidagi ma’lumotlar bazasini shakllantiradi va Davlat naslchilik kitobini yuritadi.
