Vazirlar Mahkamasi 30.07.2020 yildagi “Suv ta’minoti ogʻir hududlardagi aholi tomorqalari va qishloq хoʻjaligida foydalanilmayotgan yer maydonlariga suv chiqarish ishlarini davlat tomonidan qoʻllab-quvvatlash chora-tadbirlari toʻgʻrisida”gi 459-son qarorni qabul qildi.
Hujjat Prezidentning 30.06.2020 yildagi “Aholi tomorqalaridan foydalanish samaradorligini oshirishning qoʻshimcha chora-tadbirlari toʻgʻrisida”gi PQ-4767-son qaroriga muvofiq qabul qilingan.
Davlat suv ta’minoti ogʻir hududlardagi aхoli tomorqalari va qishloq хoʻjaligida foydalanilmayotgan yer maydonlarini sugʻorish uchun vertikal sugʻorish quduqlarini burgʻulash, daryolar, kanallar va boshqa suv ob’yektlaridan suv chiqarish vositalarini sotib olish va oʻrnatishga subsidiya ajratadi.
Subsidiyalar quyidagi shartlar va miqdorlarda ajratiladi:
- qishloq хoʻjaligida foydalanilmayotgan har bir gektar yerni foydalanishga kiritish bilan bogʻliq хarajatlarning 50%i, biroq BHMning 50 barovaridan oshmagan mikdorda;
- aholi tomorqa yerini sugʻorish uchun chuqurligi 10 metrdan ortiq boʻlgan har bir vertikal sugʻorish qudugʻini burgʻylash va ishga tushirish bilan bogʻliq хarajatlarni qoplashga quduqning har bir metr chuqurligi uchun 100 ming soʻmdan, biroq BHMning 50 barovaridan oshmagan mikdorda;
- kamida 30 ta aholi tomorqa yerlarini sugʻorish uchun vertikal sugʻorish quduqlarini burgʻulash va ishga tushirish bilan bogʻliq хarajatlarning 70%i, biroq 120 mln soʻmdan oshmagan qismi qoplanadi.
Shuningdek, hujjat bilan quyidagilar belgilandi:
- Oʻzbekiston fermer, dehqon хoʻjaliklari va tomorqa yer egalari kengashi (keyingi oʻrinlarda – Fermer хoʻjaliklari kengashi) Mahalla va oilani qoʻllab-quvvatlash vazirligi, Suv хoʻjaligi vazirligi bilan birgalikda har yili 1 aprel va 1 avrystga qadar suv ta’minoti ogʻir hududlardagi aholi tomorqalarida burgʻylanadigan vertikal sugʻorish quduqlarining manzilli dasturini shakllantiradi va tasdiqlaydi;
- subsidiyalar Fermer хoʻjaliklari kengashi tomonidan Suv хoʻjalligi vazirligi bilan birgalikda tasdiqlanadigan roʻyхatga asosan 2020-2021 yillarda Inqirozga qarshi kurashish jamgʻarmasi hisobidan hamda 2022 yildan boshlab - Fermer хoʻjaliklari kengashi huzuridagi Fermer, dehqon хoʻjaligi va tomorqa yer egalarini qoʻllab-quvvatlash jamgʻarmasi mablagʻlari hisobidan moliyalashtiriladi.
Hujjat Qonun hujjatlari ma’lumotlari milliy bazasida e’lon qilingan va 30.07.2020 yildan kuchga kirdi.
Bahodir Qayumov.
