Vazirlar Mahkamasi tomonidan 1.06.2021 yildagi «Mahallabay» ishlash tizimi orqali 2021–2022 yillarda Toshkent viloyatini ijtimoiy-iqtisodiy rivojlantirish chora-tadbirlari toʻgʻrisida»gi 337-son qaror qabul qilindi.
Toshkent viloyatini ijtimoiy-iqtisodiy rivojlantirishning asosiy yoʻnalishlari etib quyidagilar belgilandi:
- mahallabay ishlash asosida aholi bandligini ta’minlash, tadbirkorlikka va oʻzini oʻzi band qilib ishlash faoliyatiga jalb qilish;
- mahallalarning «oʻsish nuqtalari»ni (iхtisoslashuv yoʻnalishlarini) aniqlash va yangi tadbirkorlikni, shu jumladan «drayver» loyihalarni amalga oshirishda har bir mahallaning ijtimoiy-iqtisodiy oʻsishini ta’minlash;
- mahalla pasportidagi mezonlar asosida «qizil», «sariq» va «yashil» hududlarga ajratgan holda barcha mahallalarni «yashil» hududga oʻtkazish choralarini koʻrish;
- «Temir daftar»ga kiritilgan 11,6 mingta oilaning 4,3 ming a’zosini, «Yoshlar daftari»ga kiritilgan 37,7 ming nafar хotin-qizlarning muammolarini oʻrganish va ularga aniq yoʻnalishlar boʻyicha manzilli koʻmaklashish, maqsadli kasb-hunarga oʻqitish, ish bilan ta’minlash, moddiy yordam berish.
Quyidagilar tasdiqlandi:
1. 2021–2022 yillarda Toshkent viloyati tumanlari va shaharlarining «oʻsish nuqtalari» (iхtisoslashuv yoʻnalishlari);
2. 2021–2022 yillarda Toshkent viloyatini ijtimoiy-iqtisodiy rivojlantirish boʻyicha amalga oshiriladigan chora-tadbirlar dasturi;
3. 2021 yilda Toshkent viloyatida yangi ish oʻrinlarini tashkil etish va aholi bandligiga koʻmaklashish prognoz koʻrsatkichlari.
Hujjat Qonun hujjatlari ma’lumotlari milliy bazasida e’lon qilingan va 2.06.2021 yildan kuchga kirdi.
Lola Abduazimova.
