Prezident “Ozodlikdan mahrum etish jazosini oʻtayotgan, qilmishiga chin koʻngildan pushaymon boʻlgan va tuzalish yoʻliga qat’iy oʻtgan bir guruh shaхslarni afv etish toʻgʻrisida”gi Farmonni imzoladi. Unga sharh OʻzAda e’lon qilingan.
Hujjatga muvofiq, Konstitutsiya 93-moddasining 23-bandiga asosan 65 nafar fuqaro afv etildi.
Ularning:
- 17 nafari jazodan toʻliq ozod qilindi;
- 13 nafari jazoni oʻtashdan muddatidan ilgari shartli ravishda ozod qilindi;
- 20 nafariga esa tayinlangan jazo yengilrogʻi bilan almashtirildi.
Bir soʻz bilan aytganda, 50 nafar shaхs ozodlikdan mahrum etish joylaridan ota-onasi, farzandlari va yaqinlari bagʻriga qaytarildi.
Bundan tashqari, 14 nafar shaхsga tayinlangan ozodlikdan mahrum etish jazosining muddati qisqartirildi va 1 nafar shaхs ozodlikni cheklash jazosidan ozod qilindi.
Afv etilganlarning 4 nafarini ayollar, 1 nafarini 60 yoshdan oshgan shaхs, 1 nafarini chet el fuqarosi, shuningdek, 39 nafarini taqiqlangan tashkilotlar faoliyatida qatnashgan fuqarolar tashkil etadi.
Afv etilgan shaхslarning ijtimoiy moslashuvi, ularni foydali mehnatga jalb etish va sogʻlom turmush tarzini yoʻlga qoʻyishiga koʻmaklashish yuzasidan mas’ul vazirlik va idoralar hamda hokimliklar zarur yordam beradi.
Qayd etish joizki, keyingi 3 yilda yurtimizda 7 marta afv e’lon qilinib, 3952 nafar shaхs afv etildi.
