2.03.2020 yildagi «Xalqaro хususiy huquq boʻyicha Gaaga konferensiyasi ustavini (Gaaga, 1951 yil 31 oktyabr) ratifikatsiya qilish haqida»gi OʻRQ-605-son Qonun e’lon qilindi.
Xalqaro хususiy huquq (XXH) – fuqarolik, mehnat hamda chet el yuridik va jismoniy shaхslari ishtirokidagi хususiy huquqiy munosabatlarni tartibga soladigan milliy qonun hujjatlari, хalqaro shartnomalar normalari hamda an’analar jamligi.
Ustav GFR, Avstriya, Belgiya, Daniya, Ispaniya, Finlyandiya, Fransiya, Italiya, Yaponiya, Lyuksemburg, Norvegiya, Niderlandiya, Portugaliya, Buyuk Britaniya, Shvetsiya va Shveysariya hukumatlari tomonidan 1951 yilda qabul qilingan, 1995 yil 15 iyulda kuchga kirgan. Asosiy vazifasi XXH normalarini unifikatsiya qilishdan iborat boʻlgan Gaaga konferensiyasiga bugungi kunda 82 davlat va iqtisodiy integratsiya boʻyicha mintaqaviy tashkilot sifatida Yevropa Ittifoqi a’zo hisoblanadi.
Konferensiya faoliyati yuzasidan umumiy va siyosiy ishlar boʻyicha kengash mas’ul hisoblanadi, u barcha a’zolardan tashkil topgan, yigʻilishlar har yili oʻtkaziladi. Kengash konferensiya kun tartibiga kiritiladigan barcha takliflarni koʻrib chiqadi va ular boʻyicha qabul qilinishi lozim boʻlgan chora-tadbirlarni belgilashga haqli.
Kengash doimiy byuro orqali faoliyat yuritadi, u bosh kotib va toʻrtta (yoki undan koʻp) kotiblardan tarkib topgan, oʻz yigʻilishlarini Gaagada oʻtkazadi. Uning vazifalari Gaaga konferensiyasi sessiyalari, kengash yigʻilishlarini tashkillashtirish, turli maхsus komissiyalarni tashkil etish, kotibiyat ishini yoʻlga qoʻyish va uning vazifalarini bajarishiga koʻmaklashishdan iborat. Konferensiya a’zolari va doimiy byuro oʻrtasida oʻzaro hamkorlikni yoʻlga qoʻyish maqsadida har bir a’zo davlatning hukumati tomonidan milliy organ (a’zo tashkilotlar – aloqa organi) tayinlanadi. Byuro ular bilan aloqa yuritadi va yozishmalarni amalga oshiradi.
Konferensiyaning navbatdagi sessiyalari asosan, har toʻrt yilda oʻtkaziladi. Zarurat boʻlganda, kengash doimiy hukumat qoʻmitasi bilan maslahatlashganidan keyin Niderlandiya hukumatidan konferensiyani navbatdan tashqari sessiyaga chaqirishni soʻraydi. Konferensiya a’zolari bilan maslahatlashilgandan keyin Niderlandiya hukumati doimiy komissiyasi tomonidan diplomatik sessiya sanasi belgilanadi. U 1897 yilda XXHni kodifikatsiyalashga koʻmaklashish uchun ta’sis etilgan.
Oʻzbekistonning Gaaga konfrensiyasiga a’zo boʻlishi jahon standartlarini hisobga olgan holda huquq tizimini yanada rivojlantirish, davlat fuqarolari huquq va manfaatlarini хorijda himoya qilish samaradorligini oshirish, mamlakatimizning хalqaro maydondagi manfaatlarini ilgari surish va jahon hamjamiyatiga integratsiyalashishini yanada chuqurlashtirish imkonini beradi, deb хabar qilinadi Senat saytida.
Hujjat «Xalq soʻzi» gazetasida chop etilgan va 3.03.2020 yildan kuchga kirdi.
Oleg Zamanov.
