Олий Мажлис Қонунчилик палатасида қатор қонун лойиҳалари биринчи ва иккинчи ўқишда кўриб чиқилди.
- «Ўзбекистон Республикаси Вазирлар Маҳкамаси тўғрисида»ги Қонуннинг 8-моддасига қўшимчалар киритиш ҳақида»ги қонун лойиҳаси.
Қонуннинг қабул қилиниши Вазирлар Маҳкамасининг Олий Мажлиси палаталари билан ҳамкорлигининг ташкилий-ҳуқуқий механизмларини янада такомиллаштиришга, ижро этувчи ҳокимият органлари фаолияти устидан парламент назоратини амалга оширишга имкон беради.
- «Автомобиль йўллари тўғрисида»ги Қонун нормаларини такомиллаштиришни назарда тутувчи қонун лойиҳаси.
Қонун лойиҳаси биринчи ўқишда қабул қилинганидан сўнг мутахассислар ва олимлар таклифлари асосида пухта ишлаб чиқилди. Қонуннинг қабул қилиниши иқтисодиётни янада ривожлантириш, шаҳар ва қишлоқлар йўл-транспорт инфратузилмасини такомиллаштириш, аҳолининг фаровон ҳаётини ошириш учун қулай шарт-шароитлар яратиш имконини беради.
- «Ўзбекистон Республикаси Фуқаролик кодексининг 565-моддасига қўшимчалар киритиш тўғрисида»ги қонун лойиҳаси.
Лойиҳа билан жисмоний шахслар томонидан автомототранспорт воситаларини ижарага бериш шартномасини унинг нотариал тасдиқловисиз бир ой муддатга ҳуқуқий жиҳатдан расмийлаштириш масалаларини соддалаштиришни назарда тутувчи қўшимчалар киритиш таклиф этилмоқда. Ҳозирги пайтда шартномани нотариал тасдиқлаш талаб этилади. Сиёсий партиялар фракциялари мамлакатимизда туризмни ривожлантириш бўйича Президент томонидан белгиланган вазифалардан келиб чиққан ҳолда мазкур қонун лойиҳаси нормаларини такомиллаштириш зарурлигига алоҳида эътибор қаратдилар.
