Қашқадарёдаги тарихий обидаларга QR-кодларни жорий этиш бошланди

VERUM QR деб номланган мазкур лойиҳа Туризмни ривожлантириш давлат қўмитаси, Маданият вазирлиги ҳамда «Texno Dargoh» МЧЖ томонидан йўлга қўйилди.

Бу - муҳим. VERUM QR лойиҳаси SMART-сайёҳлик ва сайёҳлик соҳасида IT-технологиялардан фаол фойдаланиладиган  мамлакат сифатида Ўзбекистон имижини халқаро майдонда тарғиб этишга қаратилган.

Маълумот учун. QR-код – “quick response” инглиз тилидан таржимада “тез жавоб” деган маънони англатади. У “квадрат” икки ўлчовли  штрих-коддан иборат. Ундан ахборотни визуал кодлаштириш учун қўлланилади. Смартфонлар фойдаланувчилари сони бутун дунёда ортиб бораётганлиги туфайли анча оммалашмоқда. У Япониянинг «Denso-Wave» фирмаси томонидан 1994 йилда ишлаб чиқилган. Ахборотни ўқийдиган ва шифрлайдиган камерали телефонлар пайдо бўлганидан кейин у муваффақият қозонди. Битта кодда замонавий кирилл кодировкасидаги 1 450 ҳарфгача ёки 4 296 лотин белгиларини рақамлар билан аралаш ҳолда шифрлаш мумкин. Ҳар қандай замонавий телефонга уни аниқлайдиган дастур ўрнатиш мумкин.

Лойиҳанинг дастлабки босқичида QR-кодлар Шаҳрисабз шаҳридаги диққатга сазовор жойларда жорий этилди. Жорий йилнинг 1 апрелига қадар вилоятнинг барча сайёҳлик обидаларида шундай кодлар жорий этилади. QR-код воситасида тарихий обидалар тўғрисида бериладиган маълумотлар 12 тилда тақдим этилади.

QR-код ёрдамида сайёҳлар шундай код киритилган ҳар бир объект ҳақида батафсил маълумотларни олиш имконига эга бўлишади.

«UZCARD» тизими тўловни QR-код воситасида амалга ошириш имконини йўлга қўйгани ҳақида бу ерда хабар берган эдик.

Фозила Ашурова, мухбиримиз.