Давлат солиқ қўмитаси тест режимида янги интерактив хизматни - «Давлат солиқ хизмати органлари фаолиятини баҳолаш»ни йўлга қўйди. Бу ҳақда регуляторнинг расмий сайтида хабар қилинади.
Истаган киши ўз манзили ва телефон рақамини кўрсатган ҳолда туман ДСИдан тортиб, марказий аппаратгача — идоранинг ҳар бир таркибий тузилмаси ишига баҳо бериши мумкин.
Баҳолаш 7 мезон асосида амалга оширилади. Қуйида ҳар бир баҳолаш мезонининг аҳамияти келтирилади:
- масъулиятлилик – қонунчилик билан давлат солиқ хизмати органларига юклатилган вазифаларнинг ўз вақтида ва сифатли бажарилиши;
- очиқлик –солиқ қонунчилиги нормалари ва унга киритилган ўзгартиришларнинг ОАВда ёритилиши,шунингдек, солиқ тўловчилар учун тушунтириш тадбирларини ўтказилиши бўйича ишлар;
- шаффофлик – солиқ объектларининг ҳисобга олиниши, солиқ ставкаларининг қўлланилиши, солиқлар ҳисоб-китоби, ундирилиши, ҳисобга олинишининг очиқлиги ҳамда солиқ тўловчиларнинг Давлат бюджети билан ўзаро муносабатларининг шаффофлиги;
- ўзаро ҳамкорлик – солиқ мажбуриятларини бажаришда солиқ тўловчиларга кўмак берилиши, ҳалол солиқ тўловчилар учун солиқ мониторинги ўтказилиши, фаолият кўрсатмаётган корxоналарни тиклашда ёрдам берилиши;
- ходимларнинг хизмат кўрсатиш тезкорлиги – солиқ тўловчининг солиқ мажбуриятларининг бажарилиши, ҳисоботларнинг қабул қилиниши, интерактив хизматлар кўрсатилиши юзасидан сўрови бўйича ахборот жўнатишда ўрнатилган тартиб ва муддатларга риоя қилиниши;
- ваколатлилик – солиқ органлари ходимлари томонидан ўз функцияларининг қонунчилик билан берилган ваколат доирасида бажарилиши, шунингдек солиқ қонунчилиги бузилиши бўйича мурожаатларнинг белгиланган тартибда ва муддатларда кўриб чиқилиши;
- хушмуомалалик – солиқ тўловчилар билан давлат солиқ xизмати органлари xодимларининг одоб-аxлоқ қоидалари асосида мулоқотда бўлиши.
