Президентнинг 25.03.2025 йилдаги "Давлат божхона хизмати органларининг фаолиятини ташкил этиш ва божхона маъмуриятчилигини янада такомиллаштиришнинг қўшимча чора-тадбирлари тўғрисида"ги ПҚ-122-сон қарори қабул қилинди.
2025 йилда божхона соҳасини ривожлантиришнинг асосий кўрсаткичлари белгиланди:
- соҳага сунъий интеллект технологияларини жорий этиш;
- божхона органлари ахборот тизимларини такомиллаштириш ва самарадорлигини ошириш;
- божхона органлари ташкилий тузилмаларини оптималлаштириш.
Божхона қўмитаси тизимида Божхона расмийлаштируви маркази ташкил этилади. Ҳудудий бошқармаларнинг масофавий электрон декларациялаш божхона постлари босқичма-босқич тугатилади.
Божхона соҳасига сунъий интеллект технологияларини жорий этишнинг асосий вазифалари белгиланди:
- сунъий интеллект технологиялари соҳасида илғор хорижий давлатлар тажрибаларини ўрганиш;
- божхона назорати ва расмийлаштирувини қамраб олган сунъий интеллект технологияларини тадқиқ қилиш, уларнинг самарали ишлашини таъминлаш ҳамда доимий тарзда сифат жиҳатдан янги босқичга олиб чиқиш чораларини кўриш.
Божхона институтида таълим жараёнларини ташкил этиш ва бошқариш бўйича ҳамда профессор-ўқитувчилар фаолияти самарадорлигини рейтинг баҳолаш бўйича ахборот тизимлари жорий этилади.
2025/2026 ўқув йилидан бошлаб магистратурада тўлов-контракт асосида таълим муддати икки йил бўлган сиртқи таълим шакли жорий этилади.
2025 йил 1 июлдан чегара орқали ҳаракатланаётган автотранспорт воситаси эгасининг фуқаролик жавобгарлигини мажбурий суғурта қилиш механизми жорий этилади. Бунда:
- божхона постига кириб келган автотранспорт воситаси эгасининг фуқаролик жавобгарлиги тўғрисида суғурта полисини расмийлаштириш божхона органлари ахборот тизимлари орқали амалга оширилади;
- чет давлатларда рўйхатдан ўтказилган автотранспорт воситаларини божхона расмийлаштирувидан ўтказиш фуқаролик жавобгарлиги тўғрисида суғурта полиси мавжуд бўлганда амалга оширилади.
Қарорга мувофиқ, божхона органларининг "Хавфларни бошқариш" ахборот тизими қуйидаги йўлаклар кесимида товар, транспорт воситалари, шахсларнинг хавф даражалари ҳамда уларга нисбатан қўлланиладиган божхона назорати шакллари ва ҳажмини белгилайди:
- "яшил йўлак"да хавф даражаси паст белгиланади ва божхона назорати шакллари қўлланилмайди (товарлар чиқариб юборилганидан кейинги божхона назорати бундан мустасно). Бунда "яшил" йўлакка йўналтирилган товарлар автоматик тарзда расмийлаштирилади;
- "сариқ йўлак"да хавф даражаси ўрта белгиланади ва божхона назоратининг бир ёки бир нечта шакллари қўлланилади (божхона ва шахсий кўрик бундан мустасно);
- "қизил йўлак"да хавф даражаси юқори белгиланади ва божхона назоратининг бир ёки бир нечта шакллари қўлланилади;
- "кўк йўлак"да божхона назорати шакллари товар ва транспорт воситалари чиқариб юборилгандан сўнг амалга оширилади.
2025 йил 1 октябрдан бошлаб товарларни олиб кириш, олиб чиқиш ва транзит олиб ўтиш бўйича барча сертификат, хулоса ва рухсат этиш хусусиятига эга ҳужжатлар фақат "Ягона дарча" божхона ахборот тизими орқали расмийлаштирилади.
Ҳужжат Қонун ҳужжатлари маълумотлари миллий базасида эълон қилинган ва 01.04.2025 йилдан кучга кирди.
