Президентнинг 29.12.2017 йилдаги «Ўзбекистон Республикасининг 2018 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ–3454-сон қарори билан солиқ имтиёзлари жорий этилиши назарда тутилган.
Бюджет кодексининг 60–63-моддаларида кўрсатилган манбалардан қўшимча даромад олувчи бюджет ташкилотлари 2023 йилнинг 1 январига қадар қуйидагиларни тўлашдан озод қилинган:
- ундириб олинадиган барча турдаги солиқлар;
- Республика йўл жамғармасига йиғимлар;
- мақсадли давлат жамғармаларига мажбурий ажратмалар.
Маълумот учун: бюджет ташкилоти – давлат функцияларини амалга ошириш учун давлат ҳокимияти органларининг қарорига кўра ташкил этилган, Давлат бюджети маблағлари ҳисобидан сақлаб туриладиган нотижорат ташкилот.
Юқорида кўрсатилган моддаларда қуйидагиларнинг даромадларини шакллантириш манбалари қайд этилган:
- Бюджет ташкилотининг ривожлантириш жамғармаси;
- Тиббиёт ташкилотларининг моддий рағбатлантириш ва ривожлантириш жамғармаси;
- Вазирликлар, давлат қўмиталари ва идораларнинг бюджетдан ташқари жамғармалари;
- бюджет ташкилотлари томонидан ундириладиган тўловлар ҳисобидан бюджетдан ташқари маблағлар.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида яқинда танишиш мумкин.
Олег Заманов.
