Тошкент давлат юридик университетида ўқитишнинг модуль тизими шароитларида талабалар билимини назорат қилиш тартиби ва баҳолаш мезонлари тўғрисидаги низомга қўшимчалар киритилди (22.01.2019 йилда 2780-2-сон билан рўйхатдан ўтказилган). I ва II гуруҳ ногирони бўлган талабаларнинг оралиқ ва якуний назорат ишларини ёзма шаклда бажариш қобилияти мавжуд бўлмаганда улар оғзаки имтиҳон топширадилар.
Шу ўринда университет билимларни назорат қилишнинг ёзма шаклига катта аҳамият беришини қайд этиб ўтамиз. Ўз фикрини қоғозда баён этиш кўникмасини ривожлантиришдан ташқари, бу холис баҳо қўйилишини таъминлаш имконини беради. Ўқитувчи оралиқ ва якуний назорат ўтказиш жараёнида талаба билан мулоқотга киришмайди, шунингдек кимнинг ишини текшираётганини билмайди.
Қабул қилинган ҳужжатда белгиланишича: I ва II гуруҳ ногирони бўлган талаба оралиқ ва якуний назорат ишларини ёзма шаклда топшира олмаса, у имтиҳон бошлангунга қадар ўқув ишлари бўйича проректорга мурожаат қилиши керак. Буни тасдиқлаш учун тиббий маълумотнома ёки ТМЭКнинг хулосаси ҳам талаб этилади.
Ёзма оралиқ ва якуний назорат иши ўрнига ректор буйруғи билан тузилган махсус комиссия уни оғзаки шаклда қабул қилади. Комиссия унинг аъзоларининг камида 2/3 қисми иштирок этганда ваколатли ҳисобланади, унинг қарорлари эса баённома билан расмийлаштирилади.
Ногиронлиги бўлмаган, бироқ соғлиғининг ҳолатига кўра назорат ишини топшира олмайдиган (масалан, қўли синиб қолган) талабаларга Ўқув-услубий бошқарма бошлиғи ўқув ишлари бўйича проректор билан келишган ҳолда академик қарздорларга такроран ўзлаштириш учун бериладиган бир ойлик муддат давомида оралиқ ёки якуний назорат ишини топширишга рухсат беради. Бунда академик қарздорлардан фарқли равишда, мазкур талабалар оралиқ ва якуний назорат ишлари учун белгиланган энг юқори баллдан (яъни талаба ҳақиқатда тўплаган баллардан, таҳр.) 55% кўп балл олишлари мумкин.
Касаллик туфайли бир ойлик муддат ичида назорат ишини қайта топшириш имкони бўлмаса, академик таътил расмийлаштириш зарур бўлиши эҳтимол.
Ҳужжат Қонун ҳужжатлари маълумотлари миллий базасида эълон қилинган ва 22.01.2019 йилдан кучга кирди.
Самир Латипов.
