Прогнозлаштириш ва макроиқтисодий тадқиқотлар институти ҳузурида илмий даражалар берувчи илмий кенгаш ва “Иқтисодиёт: таҳлиллар ва прогнозлар” журнали таҳририяти ташкил этилади. Бу Вазирлар Маҳкамасининг 24.06.2019 йилдаги 521-сон қарорида назарда тутилган.
Эслатиб ўтамиз, Прогнозлаштириш ва макроиқтисодий тадқиқотлар институти Иқтисодиёт ва саноат вазирлиги ҳузурида фаолият кўрсатади.
Ташкил этиладиган кенгаш “Макроиқтисодиёт”, “Минтақавий иқтисодиёт” ва “Саноат иқтисодиёти” ихтисосликлари бўйича фан доктори (Doctor of science) ва фалсафа доктори (PhD) илмий даражасини бериш билан шуғулланади.
“Иқтисодиёт: таҳлиллар ва прогнозлар” журнали Олий аттестация комиссияси томонидан докторлик диссертацияларининг асосий илмий натижаларини чоп этиш тавсия этилган илмий нашрлар рўйхатига киритилади.
Журналда Институт томонидан мақсадли грантлар доирасида амалга ошириладиган тадқиқотлар (Институт фаолиятининг ҳар бир йўналиши бўйича) натижалари ўз аксини топади. Улар Иқтисодиёт ва саноат вазирлигининг буюртмаси асосида Инновацион ривожланиш вазирлиги томонидан ажратилиши топширилди.
Ҳужжат Қонун ҳужжатлари маълумотлари миллий базасида эълон қилинган ва 25.06.2019 йилдан кучга кирди.
Олег Гаевой.
