Жисмоний шахсларнинг мол-мулкига солинадиган солиқ ставкалари ошди

Жисмоний шахсларнинг мол-мулкига солинадиган солиқ ставкалари 2017 йил учун 2016 йилда амалда бўлганларига нисбатан ўртача ҳисобда 16%га ошди. Солиқнинг янги ставкалари қуйидаги миқдорларда тасдиқланди:

• базавий ставка (умумий майдони 200 кв.метргача бўлган) – 1,7% (илгари -1,5%);

• шаҳарларда:

- умумий майдони 200 кв.метрдан ошиқ ва 500 кв.метргача бўлган – 2,1% (илгари - 1,8%);

- умумий майдони 500 кв.метрдан ошиқ бўлган – 2,9% (илгари - 2,5%);

• бошқа аҳоли пунктларида: умумий майдони 200 кв.метрдан ошиқ бўлган – 2,1% (илгари - 1,8%).

Эслатиб ўтамиз, жисмоний шахсларнинг Республика ҳудудида жойлашган уй жойлари, квартиралари, дала ҳовли иморатлари, гаражлари ва бошқа иморатлари, жойлари, иншоотларига мол-мулк солиғи солинади. Ушбу объектларнинг “Ергеодезкадастр”  давлат қўмитаси маълумотларига кўра ушбу объектларнинг инвентаризация қиймати солиқ базаси ҳисобланади. У солиқ солиш мақсадлари учун кўчмас мулкнинг кадастр қийматини чиқаради ва кўчмас мулкка бўлган ҳуқуқлар тўғрисидаги кадастр маълумотлар базасини шакллантиради. Ушбу база жисмоний шахсларнинг мол-мулкига солинадиган солиқни ҳисоблаш учун маълумот манбаи бўлиб хизмат қилади.

Шундай ҳолатлар бўладики, қандайдир мол-мулк объектлари бўйича қиймати ҳақидаги маълумотлар мавжуд бўлмайди. Бундай ҳолларда мол-мулкнинг шартли қиймати солиқ солинадиган база учун қабул қилинади:

- Тошкент шаҳри ва вилоят марказларида – 20 328 минг сўм.;

- бошқа шаҳарлар ва қишлоқ жойларда – 8 833 минг сўм.

Белгиланган тартибда ҳали рўйхатдан ўтказилмаган ва баҳоланмаган янги (янги қурилган) турар жойлар бўйича мол-мулк солиғи мол-мулк шартли қийматининг икки баробари миқдоридан келиб чиқиб ундирилади.

Солиқни тўлаш тартиби ўзгармади. 2016 йилдагидек у солиқ солиш объектининг инвентаризация қийматидан ва белгиланган ставкадан келиб чиққан ҳолда тўланади. Бироқ, 3 000 минг сўмдан кам бўлмаган инвентаризация қиймати қабул қилинади.

Мисол келтирамиз. Тошкент шаҳридаги бир хонали квартиранинг инвентаризация қиймати кадастр ҳужжатлари бўйича 2 500 минг сўмни ташкил этади, унинг умумий майдони – 28 кв.метр. Квартиранинг ушбу қиймати ва унинг майдонига мос солиқ ставкасидан келиб чиққан ҳолда мол-мулк солиғи қуйидагича бўлади: 2 500 х 1,7% = 42,5 минг сўм. Аммо 42,5 минг сўм эмас, балки 51 минг сўм тўлашга тўғри келади. Чунки 2 500 минг сўмга эмас, балки 3 000 минг сўмга солиқ солинади (3 000 х 1,7%).

Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.

Ирина Ахметова
экспертимиз.