Тегишли Фармонга шарҳ “Халқ сўзи” газетасида эълон қилинган.
Конституция қабул қилинганлигининг 27 йиллиги муносабати билан ҳамда билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган жазо муддатини ўтаётган 92 нафар фуқаро афв этилди.
Афв этилганларнинг 20 нафари - жазодан тўлиқ озод қилинади, 37 нафари - жазони ўташдан муддатидан илгари шартли озод қилинади, 16 нафарига тайинланган жазо енгилроқ жазо билан алмаштирилади. Шу тариқа, 73 нафар шахс жазони ижро этиш муассасаларидан озод қилинмоқда ва пробация хизмати органлари назоратидан олинмоқда, 19 нафар шахсга тайинланган озодликдан маҳрум этиш жазосининг муддатлари қисқартирилади.
Афв этилганлар орасида: уч нафар 60 ёшдан ошган эркаклар, уч нафар аёллар ҳамда 79 нафар тақиқланган ташкилотлар фаолиятида қатнашганлар.
Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш юзасидан масъул вазирлик ва идораларга топшириқлар берилди.
