Қандай қилиб божхона брокери бўлиш мумкин

Низомга мувофиқ божхона брокери - божхона расмийлаштируви бўйича операцияларни декларантнинг ёки ваколатли шахснинг топшириғига биноан ва унинг номидан шартнома асосида амалга оширадиган, тегишли рухсатнома олган Ўзбекистон Республикаси юридик шахсидир.

Божхона брокери сифатида фаолиятни амалга оширишга рухсатнома олиш учун штатида божхона расмийлаштируви бўйича тегишли малака аттестатига эга бўлган камида икки нафар мутахассисга эга бўлиш ва божхона тўловлари тўланишини таъминлаш керак.

Рухсатнома олиш учун ариза берувчи Давлат божхона қўмитасига тегишли ариза билан мурожаат қилади ва аризага божхона тўловлари тўланиши таъминланганлигини тасдиқловчи ҳужжат илова қилинади. Бу ариза берувчининг танловига кўра қуйида санаб ўтилган ҳужжатлардан исталгани бўлиши мумкин:

- пул маблағларини божхона органининг шахсий ғазна ҳисобварағига киритилганлигини тасдиқлайдиган ҳужжатнинг кўчирма нусхаси;

- гаров шартномасининг асл нусхаси ёки нотариал тасдиқланган кўчирма нусхаси;

- тақдим этилган банк кафолатининг асл нусхаси;

- суғурта шартномасининг кўчирма нусхаси ёки суғурта полисининг асл нусхаси;

- ёзма шаклда расмийлаштирилган тўловчи мажбуриятларининг асл нусхаси.

Эслатиб ўтамиз: Божхона брокери учун назорат қилиниши божхона органларига юклатилган фаолиятни амалга ошириш учун божхона тўловлари тўланишини таъминлаш ЭКИҲнинг 1 000 бараваридан кам бўлмаслиги лозим (Божхона кодексининг 338-моддаси).  

Ҳужжатлар ариза берувчи учун исталган қулай шаклда тақдим этилиши мумкин: шахсан олиб бориш, почта жўнатмаси билан ёки Интернет орқали. Барча ҳолларда тақдим этилган ҳужжатлар ДБҚ томонидан акси исботланмагунга қадар ҳақиқий ҳисобланади.

Олинган рухсатнома бошқа шахсга берилмайди. Рухсатнома олган юридик шахс қайта ташкил этилганда, номи ёки жойлашган жойи (почта манзили) ўзгарганда, божхона брокери ёки ҳуқуқий вориси қайта рўйхатга олинган кундан кейин 7 иш куни мобайнида ДБҚга, кўрсатиб ўтилган маълумотларни тасдиқловчи ҳужжатларни илова қилган ҳолда, рухсатномани қайта расмийлаштириш ҳақида ариза тақдим этиши керак.

Ариза кўриб чиқилганлиги (шу жумладан қайта расмийлаштирганлиги), рухсатнома ва унинг дубликати (йўқотилган тақдирда) берилганлиги учун йиғим ундирилмайди.

Ҳужжат Ўзбекистон Республикаси қонун ҳужжатлари тўпламининг 1.08.2016 йилдаги 30-сонида расман эълон қилинган кундан 3 ой ўтгач – 2016 йил 1 ноябрдан кучга киради.

Мазкур ҳужжатнинг матни билан, у билан боғланган бошқа қонун ҳужжатларига шарҳлар ва изоҳлар билан «Ўзбекистон Республикаси қонунчилиги» ахборот-қидирув тизимида танишиш мумкин.

«Ўзбекистон Республикаси қонунчилигида янги» шарҳини

эксперт-юристимиз  

Елена ЕРМОХИНА 

тайёрлади.