Президентнинг 7.09.2021 йилдаги «Халқаро шартномани тасдиқлаш тўғрисида»ги ПҚ-5242-сон қарори қабул қилинди.
Ҳужжат билан Душанбе шаҳрида 2021 йил 10 июнь куни Ўзбекистон Республикаси Ҳукумати билан Тожикистон Республикаси Ҳукумати ўртасида имзоланган Тожикистон-Ўзбекистон инвестиция компаниясини ташкил этиш тўғрисидаги Битим тасдиқланди.
Ўзбекистон Республикаси Тикланиш ва тараққиёт жамғармаси мазкур халқаро шартномани амалга ошириш учун масъул бўлган ваколатли орган этиб белгиланди.
Тожикистон-Ўзбекистон $12 млн млн АҚШ доллари миқдоридаги бошланғич устав капитали ҳамда инвестиция портфели шаклланган сари уни $50 млн гача босқичма-босқич етказиш шарти билан МЧЖ шаклида ташкил қилинади.
Ўзбекистон Республикаси Тикланиш ва тараққиёт жамғармасининг компания устав капиталини шакллантиришдаги улуши 75%ни ҳамда «Тажинвест» ДУКнинг улуши 25%ни ташкил этади.
Инвестиция компаниясининг мақсади Тожикистон ҳудудида қўшма лойиҳаларни молиялаштиришдан иборат. Унинг асосий фаолият турлари этиб қуйидагилар белгиланди:
- фаолият юритаётган ва янги ташкил этилган хўжалик юритувчи субъектларнинг устав капиталидаги улушини сотиб олиш, қарз ажратиш, қимматли қоғозларни чиқариш орқали инвестициялаш;
- тожикистонлик ва хорижий инвесторларга инвестиция компаниясининг хўжалик юритувчи субъектлар устав капиталидаги улушини реализация қилиш;
- халқаро инвестиция ва молия институтлари (компаниялари) билан, шу жумладан Тожикистонда инвестицион ҳамкорликни йўлга қўйиш, улар билан ўзаро инвестицион фаолиятни мувофиқлаштириш, шунингдек қўшма ва инвестиция лойиҳаларини амалга оширишда кўмаклашиш;
- инвестиция компанияси иштирокчилари таркибини кенгайтириш мақсадида хорижий ва маҳаллий инвесторларни излаш ва жалб қилиш;
- Тожикистоннинг тижорат банкларига тижорат асосида маблағлар ажратиш.
Ҳужжат Қонун ҳужжатлари маълумотлари миллий базасида эълон қилинган ва 8.09.2021 йилдан кучга кирди.
Эльмира Сиразиева.
